陳豪風騷晒婚戒，並隔空向老婆Aimee示愛：「She is my queen !」

新婚的陳豪撇低老婆陳茵媺，昨晨由巴黎返抵香港，心情大靚的他向現場半百記者展示婚戒。雖拒絕正面回答是否榮升爹哋，但答案呼之欲出，難掩喜悅的他不忘隔空向茵媺冧嗌：「She is my queen！」

陳豪風騷晒婚戒，並隔空向老婆Aimee示愛：「She is my queen !」

陳豪默認做老竇，但太太Aimee暫未決定在加拿大或香港分娩。

Aimee和陳豪婚後無意在港補擺喜酒。

陳豪的媽咪榮升奶奶，全程笑到四萬咁口。

昨晨約7時，陳豪步出機場A閘，在經理人陪同下，示意現場半百記者到一旁做訪問。左手戴了婚戒的他笑足全程。計劃周詳的陳豪，一早安排了家人由另一邊閘口步出。

陳豪對老婆陳茵媺（Aimee）是否「雙喜臨門」，始終不肯「正面」作答：「口殊……總之開心，唔好問，有好消息會宣布。（會過去陪老婆生？）總之我會喺佢身邊。（老婆留加拿大直至生B？）唔係，可能遲啲返，到時話你聽。（喺加拿大定香港生？）未決定，睇吓點。（點解巴黎行禮？）我哋故事喺巴黎開始。（閃婚？）計劃咗好耐！（上月註冊？邊度註冊？）唔講。（婚禮使300萬？）唔好講錢，婚禮上我都感動到喊！大家都好開心、Relax，唔開心有記者跟，但好快平復。翌日已經好Enjoy婚姻生活，我唔想婚前流消息出去，好在冇人影到婚禮細節，我都想同大家分享，但依家唔可以講。唔係特登想瞞，係想低調。（去邊度蜜月？）呢排忙，遲啲，地點唔話你知！（一家三口去？）蜜月係爹哋同媽咪兩個去。」

不在港補擺喜酒

陳豪續說：「好多謝Aimee！遇到佢後，發生嘅全部係開心事！希望以後都係咁，She is my queen！（王后生仔定女？）口殊……（生完畀佢拍嘢定湊仔？）佢自己決定，佢係好演員，唔做戲浪費，辛苦嘢我做，佢Handle到做媽咪同演員。（佢有咖啡店股份？）佢負責收錢。（Aimee旺夫？）上天好眷顧我。（呢個父親節有特別意義？）結婚意義都好大，一Part Part同大家分享。（豪媽覺得Aimee點？）好好！（舊愛廖碧兒祝福你哋？）多謝！」他又指無意在港補擺喜酒：「會分開請食飯。（無綫轉播？）應該唔會，好多朋友要招呼。（直播飯局？）要播到年底喎！」

無綫冇要求搞節目

受訪完畢，陳豪登上七人車，先送經理人到土瓜灣，再送豪媽媽到將軍澳，豪媽媽全程笑住落車，難掩當新奶奶的靚爆心情，問到是否很開心？她嬌俏地說：「我好攰呀！」陳豪哥哥則迴避鏡頭，期間有屋苑保安前來了解。

而無綫外事部副總監曾醒明否認無綫欲將陳豪結婚變成節目：「人哋已經喺巴黎完成人生大事，唔會騷擾佢哋，無綫從冇要求過（搞節目）！相信係外界聯想出嚟。」

此外，Aimee在前晚播出的《情越海岸線》中，穿火紅泳裝配近距離鏡頭，大騷澎湃上圍。