家輝拍攝時烈日當空，難為心悠包到冚，得心口清涼啲咋！

首次執導兼主演鬼片的張家輝，前日與劉心悠在馬國拍攝期間，因擅拍鬼片的彭順探班「教路」，僅在開工首日上香的家輝才得悉應日日上香！

家輝拍攝時烈日當空，難為心悠包到冚，得心口清涼啲咋！

心悠為新片專誠學習大戲做手。

彭順（左）突然「踩場」，與心悠和家輝言談甚歡。

劉心悠前日在馬來西亞拍攝張家輝執導和主演的鬼片《盂蘭神功》，由於當地天氣酷熱，心悠罕有露出事業線，卻熱到粉臉生粒粒，我見猶憐。而家輝力求完美，其中一個鏡頭拍足八Take才收貨。期間，擅於拍攝鬼片的彭順導演突然「踩場」探班，家輝笑說：「佢係嚟收陀地o架，畀封利是佢就會走！」而彭順帶笑說：「呢度係我地頭咪嚟探吓佢囉，其實我係佢粉絲，追到佢嚟呢度！」他又指拍鬼片需要每日上香，家輝聽後恍然大悟，原來他只在開工首日才有上香，彭順笑說：「如果上咗香唔使拍八Take，兩Take就搞掂啦！」他又笑言妒忌家輝可以拍純鬼片題材電影。

多人服侍 太后排場

拍攝時烈日當空，心悠獲電影公司安排工作人員撐傘、撥扇、吹風扇和抹汗，派頭十足！她亦笑言感到好像升級做了王太后一樣，問到兩位導演在場有否感到壓力，她說：「我專注做自己和同對手嘅戲，其他冇理。不過我之前套戲講普通話，今次要調校番先。」至於有否帶護身符保平安？她透露朋友為她求了一樽東西：「其實我都唔知係乜，佢叫我隨身攜帶。」而此行母親亦有同行，心悠說：「我拍戲，佢可以四圍行吓，我成日去拍戲，要咁先增加到見面時間，如果佢唔覺得辛苦嘅話。」