萬綺雯拍床戲老公打氣

萬綺雯入行24年首次在新劇《好心作怪》演反派，原來蚊蚊最初因為疊劇而辭演：「因為疊住拍緊《老表，你好嘢！》，監製叫我聽吓古仔先，話啱我做，聽完古仔好鍾意，因為做反派先接，過嚟TVB就係想試新嘢。」蚊蚊在劇中有激情床戲及出浴戲。在錄影廠拍攝床戲令她相當尷尬，她說：「放消夜打畀老公，我話好驚，好多人望住，老公仲以為我發生咩事，佢反而叫我放膽順住劇情去做，佢係一個超級大方嘅老公，好支持我。」

蚊蚊在劇中壞事做盡、但不擔心角色會被師奶喪插：「佢雖然做咗好多衰嘢，但係奸得有原因，全為一個愛字，唔係因為愛自己嘅老公唔會咁樣，監製話如果有人掟雞蛋佢會同我擋喎，我鍾意呢個角色，有人鬧其實係成功，相信會有好多Comment。」

旅遊放鬆心情

拍了多年劇的蚊蚊拍攝期間情緒備受困擾：「成套戲都好沉重，我得幾場戲係開心嘅，對自己影響好大，做人真係唔好做壞事，我做戲都覺得個心唔好受，拍嗰陣不斷要去諗，成個人嘅情緒自然代入去，又多歇斯底里、情緒起伏好大嘅戲，幾乎每晚收工都要喊一場先瞓到，有時揸緊車都喊住返屋企，老公見到我咁樣唔掂，一拍完就同我去咗峇里島旅行陽光與海灘，去到就即刻冇晒事。」相對地與苗僑偉的夫妻情，蚊蚊形容演來輕鬆得多，她自言現實中是個為愛情不顧一切的女人，所以容易找到感覺。