李綺雯 樂瞳童顏襟撈

由亞視轉戰無綫的李綺雯（o靚妹）入行逾十年，得天獨厚的她仍給人孩子氣的感覺，參演的角色多是神經質傻更更，早前她憑劇集《仁心解碼2》的變態殺人犯一角爆出，被楊怡殺害一幕更令人心寒！最近她在劇集《情越海岸線》中癡戀黃浩然，甚有發揮，更不乏性感鏡頭，她笑言最高難度是要谷咪上陣！對於被指童顏，她承認外形襟老：「可能我塊面比較肥，鼻又唔高，望落去會細個啲，似公仔樣，有時睇番玩得好開心笑晒個樣，都仲好似細路仔，但依家開始老喇！」對於外號為「o靚妹」，她透露初入行時總被忘記真名，於是鬥氣自我介紹做「o靚妹」，亦不介意到50歲時仍「繼續o靚」：「但個名都累事，因為太普通，試過好多嘢明明唔關我事，都拖咗我落水！」

體罰交足戲

談到兒時往事，看似反叛的o靚妹表示頑劣事件並不多，最爆是小學時與男同學打架而成為班中紅人：「個男仔撩我先，於是我哋不停互踢，搞到佢上五吋下五吋瘀晒，佢竟然向媽咪投訴，我心諗乜佢咁渣嘅，我都冇出力！可能我形象惡開，傳傳吓大家就以為我好好打。」o靚妹強調並非頑皮分子，只是愛據理力爭為同學出頭，早熟的她更深明社會智慧：「好細個就明白唔好令上級嘅人難做同尷尬，所以同老師關係幾好，大家保持平等，盡量雙贏！」不少人認為o靚妹適合做議員，她亦笑言曾有此打算，但現在選擇做主持及演員發揮口才。

o靚妹在家中亦常與母親鬥智鬥力，盡量爭取機會玩及偷懶：「我咁早熟係因為睇得多劇，而阿媽鬧得我最勁就係唔畀我成日睇電視，我都蠱惑，趁佢瞓覺就唔開聲睇，好多時佢都扮唔知嘅！」她又透露母親會進行體罰，其實主要想嚇她，故她會做足「反應」滿足母親：「媽咪見到乜就拎起手打我，但其實間屋咁細點會打極都唔中呢？我睇穿晒㗎喇！都係想嚇我之嘛！」認真百厭！

已飾演阿妹N次的樂瞳擁有一副長不大的面孔，前年為劇集穿校服演中學生仍維妙維肖，去年曾飾演鍾嘉欣細妹及黃宗澤表妹，最近則在劇集《情越海岸線》演黃浩然的妹妹，一名愛發明星夢的反叛大學生！對於天生童顏，樂瞳笑言「有辣有唔辣」：「可能我唔係呢行會更開心，始終生得後生咗，但演戲就會定型，不過都好嘅，每逢監製要搵『阿妹』都會諗起我，算係一定程度嘅成功，好多編審都錫我，會特登幫我寫條線，到大結局都仲有我，已經係幸運！（細個都係童顏？）我覺得讀書嗰陣似師奶o架！啱啱入行又亂化妝，依家反而似後生咗，都係形象啫！」她透露於新劇《守業者》演自梳女，希望為觀眾帶來新鮮感。

難逃「母」指山

提到經常扮演倀雞阿妹，但現實中的樂瞳其實是斯文家姐，因家教甚嚴，故這位「大家姐」毫無霸氣，完全「臣服」於媽媽的「五指山」，長大後其母也笑她「死蠢」：「媽咪叫我唔好玩火玩刀，我同細佬真係好聽話完全冇玩過，就算開冷氣都要打電話問准媽咪先。」循規蹈矩的樂瞳常在學校做班長，並深得老師喜愛，問到兒時最反叛的大事件，她苦思良久才能勉強說出一件所謂「曳事」：「小六嗰陣幫表姐寫情信畀佢意中人，最後穿咗煲要見校長，話我哋咁細個唔可以做呢啲嘢，但呢件事媽咪應該唔知。」

直至中三，情竇初開的樂瞳瞞着母親拍拖，但膽小的她跟足家訓，每晚必定十點前回家，絕不敢越軌！未知其初戀男友會否感到相當無奈呢？樂瞳說：「佢會接我放學，但媽咪五點就放工，我一定要早過佢返屋企，仲要兜路行避開父母嘅耳目，仲有只有我可以打畀佢，佢唔可以打嚟我屋企！（出夜街？）唔會呀！阿媽會鬧！試過一班朋友燒嘢食搞晏咗，啱啱透完爐我就要走。」樂瞳其後到英國讀書，母親才知道其男友的存在，成功發展「地下情」兩年，相信已算是樂瞳的「曳曳代表作」吧！

校服誘惑

外形夠Young的樂瞳與妹曾穿中學校服拍劇，並引起不少回響，堪稱兩代最佳學生妹！

樂瞳2011年於劇集《點解阿Sir係阿Sir》中飾演反叛學生「中女」鍾家寶，穿上格仔校服裙的她像真度100％，更一夜間榮升「宅男女神」，人氣急升！

o靚妹2008年於劇集《尖子攻略》中飾演羅仲謙女友「嚴家樂」，要狂打泰拳並練得一身肌肉，但穿上旗袍款式的校服時則青春可愛，獲不少網友讚賞。

後記：密謀同居

樂瞳與o靚妹一個慢熱一個主動，但兩人卻非常投契，五年前首次合作處境劇《同事三分親》而成為好友，妹大讚樂瞳純良易相處，更曾打算與她同居，樂瞳則說：「妹瓣數多又識照顧人，都諗過同佢住，但因為屋企原因暫時未可以。」妹指樂瞳外形雖然孩子氣，但其實思想成熟：「當年同佢傾將來計劃，佢已經好清楚自己想做乜，有啲人好大個都好低能，溝通唔到，但樂瞳好有諗法！」