健仔耳語呼喚遇溺母
藝人張衞健的75歲母親前日游泳遇溺入院，向來侍母至孝的健仔即日由杭州趕返香港照顧。健仔昨午透露母親正接受「冷凍治療」，晚上更在醫院宣布好消息，表示母親接受治療後情況樂觀，正在好轉比預期中好，在她耳邊說話打氣時，眼睛有微微張開。
健仔昨午講及母親病況時神色凝重，幸好晚上便帶來好消息，指她情況轉趨樂觀！
健仔離開ICU時心事重重，但仍接受傳媒訪問，並感謝各界對母親的關心！
健仔向來母子情深，當他得知母親遇溺入院即放下工作，趕返香港照顧。
張茜隨健仔趕往醫院探望遇溺昏迷的奶奶。
見完奶奶後的張茜一臉憂傷，健仔即捉緊她的手安慰。
兩名疑似酒店代表到醫院慰問張母親屬。
張衞健（Dicky）的75歲母親余嘉碧前日在酒店泳池游水時遇溺昏迷，送院搶救，他當晚10時許由杭州返港趕往醫院，與妻子張茜一同入病房了解母親病況。約兩小時後，Dicky在助手陪同下見記者，並神情凝重地說：「我啱啱喺杭州拍戲，收到消息即時趕返嚟，醫生講媽咪仲昏迷緊，希望所有識我或者識我媽咪嘅人，可以幫佢祈禱。」問到張母是否仍未過危險期，他沉思數秒才回答：「可以咁講，情況唔係令人太安心。」他指暫未考慮是否要停工，先觀察母親情況才決定，因母親仍在深切治療部，故未能徹夜留守病房。
新抱張茜憂心忡忡
其後，Dicky與張茜及兩男一女友人，由醫院保安帶領下由秘道離開，登車往佐敦醫肚，兩夫婦全程憂心忡忡，用膳後即坐車返大埔道寓所。記者昨日曾聯絡Dicky詢問張母情況，他說：「我唔知點講，應該仲未係（度過危險期），醫生唔知佢醒唔醒到，啱啱做完『冷凍治療』，等媽咪身體熱番先，呢兩日會繼續做腦部檢查，睇吓腦細胞受損幾多，甦醒機會幾大。」電話中的他語氣沉重，透露暫時有兩、三名醫生負責治療母親，暫時未考慮再搵其他專家幫助：「交番畀醫院醫生負責。（醫生有冇透露幾時係關鍵時間？）冇咁講。」並指因有很多事情需處理，不方便再多講。據知，張母仍處於觀察期，不能進食及需吊鹽水，需要靠儀器呼吸。
昨午約12時，兩名疑似酒店職員的男子到醫院慰問，逗留約十分鐘後離開，全程未有回答記者問題。直到下午4時半，Dicky獨自離開ICU病房，神色凝重地說：「辛苦晒大家，唔想大家等咁多個鐘。媽咪仲未醒，未知情況點，做完『冷凍治療』，希望到時媽咪可以醒番。」他透露由於一家人是天主教徒，故安排了神父進行「傅油」的祝福儀式：「呢個儀式唔代表啲咩，年滿65歲嘅教友都可以做，希望天主幫助媽咪渡過難關，或者天主有其他安排想佢離開，帶到上帝身邊。」並再次多謝外界的關心：「多謝所有朋友，唔使擔心我，我哋家人好堅強，多謝所有人關心。」語畢便步返病房。
微微張開眼有反應
接近8時半，Dicky再次踏出ICU病房並宣布好消息：「媽咪有反應，比預期好！原本喺預期中，今、明兩日仲昏迷，但喺10幾分鐘之前，我哋喺媽咪耳仔邊講嘢，見到媽咪眼睛有少少張開，感覺佢好努力咁畀反應，但始終麻醉藥未過。」問到母親是否已甦醒，他說：「唔敢講，算係。」他指母親情況樂觀並正在轉好。而他昨日亦在微博為母親打氣，貼上鮮花照並留言：「請大家為我媽媽加油，祈禱！也請大家放心，我和茜茜都很堅強！」妻子張茜亦即時轉載：「感謝所有關心我們和媽咪的人！感謝！」
據知，Dicky三兄弟不停在母親耳邊打氣：「媽咪你好叻女，快啲醒啦！醒番就帶你旅行。」因為張母極愛到陽光與海灘的旅遊勝地度假，故她在港時仍會到酒店游水，而張母在兒子打氣下，眼皮閃動有6、7次之多。
