李詩韻難忘夜潛遇鯊魚

藝人李詩韻去年考取潛水牌，早前便到馬爾代夫享受海底世界，更與海龜暢泳，但最難忘是夜潛時首次遇上鯊魚，她說：「我係第一次見到鯊魚，佢當時瞓咗所以定住唔郁，我咪慢慢游過去，只差兩米距離！雖然知佢唔會咬人，但都一游一驚心！」當滿心歡喜離開海底世界，上水後卻出現巨大反差，她說：「喺海底見到好多好靚嘅魚同珊瑚，好似魔鬼魚同龍蝦，但上番水面就發現晚餐全部都係海鮮，一時間好難適應，隨時食番頭先見嗰條魚，感覺好怪！」對潛水興趣日益濃厚的她希望能一直潛下去，並揚言要在海底影結婚相，拍一對新人得到「萬魚拱照」！