三哥以踩單車喻人生，自言識回頭遷就戚美珍，兩夫婦漫遊人生路。

苗僑偉因拍新劇迷上踩單車，日前全副武裝雄風盡現，但他不愛追風反而愛「漫遊」，並以踩車喻人生伴侶，一方即使踩得多遠，要像他般識回頭遷就並要同步，笑言與戚美珍的人生路就是這樣行出來的。

三哥以踩單車喻人生，自言識回頭遷就戚美珍，兩夫婦漫遊人生路。

Niki咀勻黃宗澤和三哥，三人可謂交換口水！

因拍劇迷上踩單車的三哥，更拉埋老婆陪玩。

三哥在新劇中飾演沽名釣譽的商人，其後因換心變善良，實屬演技大考驗。

苗僑偉（三哥）在無綫新劇《好心作怪》過足戲癮，劇中他有多場踩單車戲份，令他迷上踩單車。為求玩得專業，三哥更花一萬多元購買單車，一星期更抽空三日與老婆戚美珍踩車郊遊：「好過喺屋企玩跑步機，咁悶！其實夜晚踩單車好舒服，最近我引埋三嫂陪我一齊踩！（重拾當年拍拖Feel？）冇喎！大家好專注！雖然三嫂踩得慢，而我又踩得快，但就算踩得幾遠，我都會踩番轉頭陪三嫂『漫遊』，人生嘅伴侶條路就係咁行！男人係行得快啲，只要識行番轉頭就得，正如我一樣，由始至終我都識得行番轉頭！」

對於《好》劇收視，三哥坦言未有壓力，憑新鮮的題材他有信心攞到28、29點收視，並笑言其衰人角色是他從演以來最乞人憎：「我喺劇中演一名沽名釣譽嘅商人，後來因為一次意外，換咗演醫生嘅黃宗澤心臟，之後我性格都接收咗對方嘅踏實、善良本性，呢啲內心戲從心出發，對我嚟講係一項大考驗！」

與Niki宗澤交換口水

劇中三哥與萬綺雯飾演兩公婆，一場生離死別戲份令他為之回味。至於與周麗淇（Niki）和黃宗澤的三角關係，三哥坦言很「重口味」：「其中一場Niki起幻覺，同宗澤咀時諗起我，所以拍時Niki要連咀兩個男人，大家啲口水交換晒啦！（同萬綺雯有咀戲？）比較少，其實佢個角色係悲劇收場，但我始終最愛佢，結局一場戲講佢毀容，為咗試我，將自己個樣變咗Niki。」