黃家強台上含冤控訴
Beyond前成員黃家強的演唱會前晚在九展畫上完美句號，他在台上繼續懷念黃家駒，對於黃貫中最近對他的連番指控，他逐一作出澄清，更大方表示會接受對方的一切，將最近惹來的風風雨雨拋諸腦後。
是非纏身的家強落力演出，全場High爆！
家強憶及亡兄時，一度眼泛淚光，獲全場觀眾吶喊支持。
盧凱彤擔任尾場嘉賓，與家強大鬥唱功。
黃家強《It's Alright LIVE 2013演唱會》尾場演出前晚在九展順利完成，甫開場，High爆的Fans即湧到台前，氣氛高漲！黃貫中（Paul）最近不時向家強開火，家強在台上大訴冤屈：「今次係黃家強演唱會，唔好誤會，但家駒離開咗二十年，係咪做細佬嘅同阿哥講句『好掛住你』都唔得？」說時眼泛淚光，台下歌迷即為他打氣，大叫加油！家強續說：「我要懷念我阿哥，想幾時就幾時，你做又好唔做又好，唔好阻住我！」並帶領全場觀眾齊齊高呼：「家駒，我懷念你！」家強在台上表示音樂路難行，歌迷叫他搵兄弟幫手，家強說：「少兩個，多咗六個，但唔好亂講，事情冇絕對！」似乎與Paul及葉世榮之間的關係仍有轉圜餘地。
借結他另有其人
完騷後，家強接受訪問，繼續澄清最近與Paul之間的是非。Paul稱家強曾向他借結他卻一借冇回頭，家強說：「一來我唔係冇錢，加上家駒留咗咁多結他畀我，我懷疑佢記錯人！我記得佢之前借咗支結他畀William（前Beyond成員），仲染咗色，最後整爛冇還。」另有指他未有完成家駒心願開設音樂學校，家強說：「呢個其實唔係家駒嘅心願，係我講出嚟希望延續家駒嘅音樂，我暫時冇呢個能力。」他又否認將Beyond當成家族生意，表示大家都可唱Beyond的歌曲，受Beyond保護。此外，早前亦有指家駒當年意外過身後獲賠約一億港元，Paul日前已表示「一毫子都未收過」，而家強亦澄清：「我都冇攞過，賠償係唔會畀父母以外嘅人。」
怕Paul有情緒問題
提到Paul日前態度突然一百八十度轉變表示支持他開騷，問到可會擔心Paul有情緒問題？家強說：「擔心過，不過我係局外人，依家大家各自有家庭，留番畀家人照顧，無論佢點改變，由鬧到支持，我都會接受，舊嘅事過咗去唔再提（近排嘅事都可以當過去？）我可以o架。」
