家強指哥哥家駒是他音樂路上的啟蒙老師，並彈奏家駒教他彈的第一首歌《Love Will Tear Us Apart》。

樂隊Beyond主音黃家駒逝世二十年，前晚在細佬黃家強的個唱上「現身」，兩兄弟隔空對唱！粉絲揮動白色蠟燭及閃燈牌，大會更播出家駒生前的聲帶，場面非常煽情。

家強指哥哥家駒是他音樂路上的啟蒙老師，並彈奏家駒教他彈的第一首歌《Love Will Tear Us Apart》。

家強為悼念哥哥家駒離世20周年，特別安排與家駒隔空合唱一曲《誰伴我闖蕩》。

甄楚倩（右）到來睇騷，與台下歌迷齊齊舉起白蠟燭悼念家駒。

黃耀明（左）與家強合唱《長城》，令觀眾聽出耳油。

任賢齊（右）和家強合唱，更鼓勵對方加油。

黃家強前晚在九展舉行《黃家強It's alright LIVE 2013》演唱會，其父母、家姐、太太及大仔慶陽均來撐場，但未見葉世榮和黃貫中（Paul），而盧凱彤、黃耀明及任賢齊則任表演嘉賓。不過，可能現場音響太勁，首次捧老竇場的慶陽嚇到撳實耳仔，非常搞笑。

播出生前聲帶

家強除獻唱外，亦紀念今年逝世二十周年的哥哥家駒，歌迷自備白蠟燭及家駒的燈牌作悼念，而家強特選一首《誰伴我闖蕩》與家駒隔空對唱，又演繹家駒多首經典金曲，場面感人。接着大會播出家駒的聲帶：「大家係咪覺得黃家強好少講嘢呢？呢個就係我細佬，家強！」令人感到家駒恍如置身個唱中。

至於Paul早前在微博鬧爆家強，前日他態度突變為家強打氣。前晚家強在台上說：「我只想喺自己演唱會度開開心心，同你哋一齊紀念家駒，我覺得點解紀念人……」怎料說話未完，台下有激動的歌迷高呼：「唔好理佢！明晒，撐你，唔使講，你最高貴！」更有熱血粉絲大叫：「佢講嘅都係廢話！」家強見狀立即「撲火」說：「好喇！唔講喇！」唱到他今年為家駒作的新歌《好好》時，家強說：「其實我諗呢份禮物，係想話畀家駒聽，大家都好好。等佢唔使再擔心我哋。大家有冇一齊參與？送張相畀家駒話佢知，大家都好好？」歌迷在台下大叫：「有！」家強開心說：「多謝你哋啲相。」似暗示沒有提供相片的Paul。