戥好友開心 天明：預咗冇事

洪天明：「我哋一班好友一早都預咗冇事，之前都冇擔心過佢，件事都已經過咗咁耐，依家唔使再去警署。（慶祝吓？）唔使啦！我哋成日慶祝o架啦！」

周家蔚：「好開心，清者自清，志偉聲譽一向都好好，所以個個都好幫佢、好撐佢，今次嘅結果還志偉一個清白。」

謝天華：「不嬲都知冇事，好有信心，我之前見佢，佢直頭冇提過呢件事。其實身邊朋友都知成件事係點，冇擔心過。（同佢慶祝？）咁又唔使，佢見慣大場面，呢啲小事啫！」

湯盈盈：「我都唔記得咗件事囉！哈哈！總之冇事就好啦！專心做獎門人。」

錢嘉樂：「從來都唔擔心，佢都見慣風浪，『高人』使乜擔心呀！好人會有好報嘅。唔使特別同佢慶祝，佢啲朋友一路都幫佢慶祝緊，我哋每個多星期都會見一次面，大家食餐懵。」

高海寧：「呢個結果好好，終於水落石出，志偉嘅為人係點大家都好清楚，佢好有義氣又鍾意幫助人，希望件事告一段落。」

陳百祥：「對香港司法好有信心，香港司法係公正嘅，相信志偉有可能係輕撫過人哋塊面，係咪打人，真係要靠司法判斷，好似咬人同錫人，肉緊起嚟都好難分。」

苗僑偉：「真係要恭喜佢，佢都畀件事搞咗半年，最近家事煩擾，家事畀人搞出嚟，依家都冇事啦！真係戥佢高興。」