曾志偉獲無條件釋放
曾志偉去年12月被指涉嫌掌摑徐淑敏老公黃浩，事件昨日終告一段落，志偉昨日獲警方正式通知無條件釋放，總算「還我清白」。他離開警署時笑晒心情靚，並直豎拇指示好！提到被捕當日要按程序打指模及拍照存檔，他顯得有點無奈，但笑言當作一種經驗，日後大可用於拍戲上，性格大無畏。
志偉獲無條件釋放自然心情大靚，笑到四萬咁口。
志偉辦妥有關手續後，在大律師盧敏儀陪同下登車離開警署。
去年12月5日，曾志偉出席前港姐鄭嘉雯的婚宴，當晚黃浩報警稱被人掌摑並到醫院驗傷，同月19日志偉被警方拘捕，其後多次出入警署保釋候查。事件擾攘逾半年，志偉於昨午三時，在大律師盧敏儀陪同下到中區警署報到。志偉不時面露笑容及向記者揮手，似乎信心十足。最終志偉獲警方通知無條件釋放，眾人在警署逗留近40分鐘辦妥有關手續後登車離開，志偉有禮地揮手道別，又豎起手指公示好，其後他往九龍塘用膳，飽腹一頓後離開餐廳，邊行邊笑住回答記者提問。
記=記者 曾=曾志偉
記：無條件釋放，依家心情點？
曾：平常心！係會覺得冇事，相信香港法律，司法公正，結果冇令我失望。
記：慶祝？
曾：唔會喇！平常心，有、冇事都要食飯。馬照跑、舞照跳。
記：曾經作最壞打算？
曾：中間有閃過一下萬一，但之後冇再諗。
「放低咗件事」
記：事件付出好大代價？
曾：時間囉！因為要轉擔保、令朋友擔心，但事件得到家人、朋友支持，最想特別多謝盧敏儀，佢全程陪住我，畀好多信心我話一定冇事，家人支持係必然嘅。今日都接到好多朋友電話、訊息，好多謝大家關心。
記：最窩心係朋友可貴？
曾：由事件發生咗之後，有好多法律上朋友打電話畀我畀意見，有啲以為係一般嘅朋友，好耐冇見嘅朋友，但其實係佢哋最早打畀我，原來真係好多關心我嘅朋友。
記：點睇成件事？
曾：兩個字，放下！覺得件事放低咗，由出警署門口一剎那已經放低咗。
記：有否曾經求神問卜？
曾：冇！我唔係迷信，有啲事啱就係啱。如果錯，唔會因為你去求就會變啱。
記：事件有冇影響過工作？
曾：冇！發生事之後，每次都係由朋友提起，平時我都冇擺喺心，唔想因為件事影響到自己。大家清楚我為人，多謝大家一直以來嘅支持同關心，事件終告一段落。
打指模平常心
記：被拘捕時曾經需要打指模同拍照存檔？
曾：當然第一個感覺係覺得好奇怪，點解咁小事要做呢啲程序呢？之後我當係一個學習囉！原來第日拍戲我哋要咁做先至係正確，所以平常心面對整件事。
而昨日警察公共關係科亦公布，就去年12月5日晚在肇事現場發生的普通襲擊及刑事恐嚇案，警方經調查及諮詢法律意見後，一名60歲姓曾被捕男子（即曾志偉）已獲無條件釋放。
