鵬哥透露娜姐將以性感造型上陣，向觀眾大放笑彈！

兩代「扮嘢大師」盧海鵬及詹瑞文開騷在即，昨日在記者會上已忍唔住「露兩手」，與嘉賓劉以達即場發功扮達明一派！鵬哥大爆性感女神周秀娜將以超性感的白色透視恤衫賣笑，有得睇又有得笑！

鵬哥透露娜姐將以性感造型上陣，向觀眾大放笑彈！

詹Sir（右起）向劉以達送吻回禮，鵬哥只在旁「食花生」睇戲。

盧海鵬及詹瑞文昨日舉行《詹瑞文盧海鵬紅館奇幻扮嘢大典》記者會，表演嘉賓劉以達亦有撐場，搞鬼的三人未開騷先發功，演出「撻成一塊」（達明一派）的《壽頭記》！達哥即場送上個人專輯，但忘記「鵬」字的寫法，他又突然獻吻，鵬哥作狀「星」他，並笑說：「抱好喇，咪錫！」而詹Sir則送吻回禮，達哥「爆粗」助興：「當年睇鵬哥扮自己，真係笑『乸』到我碌地呀！佢扮完多咗人識我！」在旁的鵬哥抵死地說：「唔紅都扮到紅呀！意思即係扮到全世界都識咁解！」問到可會扮黃耀明攬仔？鵬哥笑說：「佢當年都未攬！」

唔介意做老虎乸

鵬哥大爆會與周秀娜及詹Sir「蚱蜢」上身，扮組合草蜢，又透露娜姐會穿上蔡一傑的噴血白恤衫透視裝！問到鵬哥可頂得住娜姐的澎湃身段？他得戚地說：「我身材夠好咯！」問到詹Sir與性感女神合作，可有向緋聞女友Amenda備案？他即面有難色，九唔答八說：「依家興男朋友，拍拖都要問阿媽？」本報記者昨日致電娜姐，問到與兩人合作感受如何？她識做地大讚：「佢兩個直頭可以開門派教扮嘢，我扮乜都冇所謂。」又笑指樂意配合《少年Pi的奇幻漂流》的主題，扮演海報上的「老虎乸」。