吳彥祖愛妻捱刀誕8磅B女
吳彥祖與太太Lisa S.公布「升呢」為人父母後，新手爸爸隨即出席公開場合，難掩興奮的吳彥祖坦承會送贈珠寶慰勞嬌妻。他透露第一眼望見「自家製造」時，感覺很突然兼來不及反應，對女兒一頭濃密頭髮印象難忘，更打趣半年後計劃「再接再厲」。
吳彥祖提起囡囡Raven即一副冧樣，但又擔心囡囡將來會招惹狂蜂浪蝶，真矛盾！
吳彥祖與Lisa於網上公布喜訊，並上載囡囡Raven的小手（左起）、BB車及BB鞋分享喜悅！
BB車
BB鞋
吳彥祖與Lisa於去年底宣布成功造人，他當時更興奮到彈起！（資料圖片）
Lisa因B身一直打橫而要開刀誕女，猶幸母女平安！（資料圖片）
吳彥祖（Daniel）太太Lisa S.上周四剖腹誕下重7.84磅女兒Raven，夫婦倆昨日於互聯網公布喜訊，更讓Raven的小手「露面」，隨即有不少圈中好友留言祝賀！
爸爸Daniel昨午與劉青雲及古天樂出席《竊聽風雲3》開鏡活動，心情大佳的他答謝在場人士的祝賀，談及太太分娩過程時說：「推入產房20分鐘左右就生咗，因為個B冇掉頭，一直打橫，所以要開刀。睇住自己愛人被割一刀，情況好恐怖，我只敢望一眼，有負責剪臍帶但冇拍Video，總之好似打仗咁！嚟唔切反應就見到8磅重嘅巨B，Lisa直頭話佢似3個月大，好多頭髮。（似邊個多啲？）嘴似我，但依家單眼皮，眼睛好中國人囉！」
半年後再造人
Daniel表示Raven出現黃疸情況，故仍留院照燈，Lisa則留院照顧女兒，目前決定餵哺母乳。剛為人父的他坦言開始擔心囡囡的前途：「佢生得幾靚，好擔心十幾年後拍拖嘅問題，希望在場啲叔叔到時幫吓手扮惡，趕走啲狂蜂浪蝶！」他又表示會送禮慰勞太太：「應該都係送珠寶！（囡囡呢？）幫佢成立教育基金囉！（再生？）半年後先再諗啦！」
爺爺改中文名
談到Raven的名字由來，Daniel表示與太太一同決定，因覺得發音好聽，而Raven中文名則交由爺爺負責，由於吳家移居美國多年，新任爺爺正計劃9月來港探望。記者翻查資料所得，Raven名字源自英國，形容頭髮或皮膚烏黑的人，亦有帶來好消息的意思。
對於B女因打橫而令Lisa未能成功順產，婦產科醫生余啟文表示有一定危險性：「BB出世時係由頭部出先，如果B身打橫根本出唔到嚟，會引致孕婦突然穿羊水、BB臍帶下垂甚至脫落。」問到為何B身打橫？他指原因很多：「有機會係婦女胎水過多，令BB喺胎內嘅活動範圍增加，又或者係孕婦子宮有瘤而阻住BB轉身。」
