雯女被監製轟歪曲事實

由鄧萃雯主演的《金枝慾孽貳》開播以來，受盡非議，觀眾頻呼劇情「難明」，論「戲味」更不及雯女與台前幕後的鬥法咁好睇！雯女批評《金貳》「飛紙仔」，「辣」盡台前幕後，先後被編審周旭明及同劇拍檔黃德斌暗寸，日前連無綫總經理李寶安亦狠批雯女輸打贏要，並揚言：「暫時唔好再合作住啦！」可謂高潮迭起。

勢孤力弱的雯女連日來迴避傳媒，昨日下午一時許被發現到西貢濠涌開工。被問到知否《金貳》晚上有飯局睇結局，她即表現愕然兼略帶抗拒，只說：「我要開工。（收工去？幾點收工？）拍晒為止。」說罷進入片廠開工。直至晚上七時，雯女收工離開，被問到遭無綫封殺，她只笑而不答，再被問是否收工去《金貳》飯局，她卻默不作聲，登上製作人楊紹鴻座駕，轉往白沙灣茶座傾工作。記者追問雯女是否覺得《金貳》台前幕後小器而被飛出飯局，她充耳不聞，沒有作答。

戚其義：傷害個劇

其後，鄧萃雯經理人以電話回應：「雯女從來冇呻過半句。（之前飯局都冇預佢喎？）佢之前唔喺香港，返咗內地工作，就算叫到都要睇吓得唔得閒，以我所知，雯女冇唔開心。（佢會唔會支持結局？）有時間佢一定睇，阿媽同啲親戚實會撐佢，唔好搞到佢被孤立咁，可能人哋有叫過佢，咁我就唔知呢！」

另一邊廂，蔡少芬、伍詠薇與黃德斌昨晚出席《金貳》飯局，監製戚其義終火山爆發，開腔鬧爆雯女：「雯女講嘢絕對傷害咗個劇，老闆投資成千萬，你係咁叫人唔好睇，咁係咪正常？出街一星期咁多負面嘢，殺傷力好大，對演員唔公平，黃德斌反應係正常，佢哋受命極力宣傳，另一邊有人極力唱，睇到新聞都唔開心，唔好為新聞而歪曲事實，唔好為效果而答嘢，但佢同周旭明嘅隔空罵戰，面對面講會冇嘢。（減少同雯女合作？）唔係我話事，睇市場、老闆，到時係佢唔要我。（唔叫雯女出席？）都唔係今次啦！次次有今次冇就話出奇啫！（對收視失望？）你見我語氣都知唔開心。」

伍姑娘：問心無愧

至於蔡少芬對周潤發也睇唔明劇情，她狂笑說：「有留意已經開心！（有冇聯絡雯女？）私下有，但今次飯局冇，因為唔知邊個嚟。」黃德斌則說：「哈哈，佢（周潤發）呢排係咪好悶？都唔出奇，唔知佢有冇睇晒，亦唔知係咪佢杯茶。」

而伍詠薇被問有否找雯女，她說：「Day 1冇，Day 30都冇。（唔怕傳你哋唔妥？）我有咩怕？最怕冇錢，我問心無愧。（點睇無綫唔搞觀眾睇結局？）二萬人一齊定十幾人一齊睇，其實係睇自己心態，佢唔搞，我哋自己搞，每人夾400幾蚊都OK。」