陳嘉桓護情亂解畫
現年20歲的前「峯嫂」陳嘉桓（Rose）被《好報》踢爆與37歲有線奀主播「衞帝」衞志豪撻着。為保護發展個多月的新戀情，二人昨日夾晒口供死撐冇拍拖，Rose更用阿媽做擋箭牌，不過「衞帝」卻含笑預告會約Rose食飯。
戀情曝光，陳嘉桓即自爆有戲拍。
衞志豪出名「癡心」，相信對嫩口陳嘉桓會捧在手心呵護。
衞志豪（右二）上月中與陳嘉桓及陳母（左二）睇樓斷正。
陳嘉桓日前托胸搬行李出入寓所。
被揭秘撻個多月的衞志豪與陳嘉桓，死口不認，無非想保護新戀情啫！（設計圖片）
陳嘉桓昨日被《好報》踢爆秘撻有線奀主播衞志豪，據知二人於4月底赴韓國拍攝有線旅遊節目時，飾演前世戀人戲假情真，於Facebook自稱「皇上」的衞志豪更以「皇后」暱稱Rose，大晒頭貼頭照洩蜜。撻着個多月，「衞帝」已融入Rose家中，更做跟得男友，一有時間便陪Rose及未來外母四圍物色新居，又碌盡人情卡為女友搵筍Job，照顧周到。
戀情曝光，二人昨日分別出席活動時明顯夾晒口供，死撐唔認戀情。Rose昨午出席品牌派對，對於與「衞帝」撻着，她死撐只是朋友︰「我唔係同Michael（衞志豪）拍拖，係朋友，佢同媽咪Friend啲。總之依家未有男朋友，想做嘢行先，有時間想陪家人。」問到圖文並茂被拍得與「衞帝」陪母親三人行睇樓，她繼續死撐︰「嗰日係等媽咪收工，然後去睇相，個師傅係Michael介紹，所以佢一齊去。」
蜜運即有新戲拍
Rose表示暫時無意搬屋，當日搬紅白藍袋只是拿舊衫捐出︰「依家住得舒服，新界雖然遠，但有揸車。」今年工作未見突圍，故被指靠男友的人脈接Job的她，順勢自爆再闖影壇，今個月在港開工拍新片，現正狂操喼弗。
至於「衞帝」出席另一活動時，與Rose口徑一致︰「我哋係朋友，唔係拍拖，我邊有咁嘅本事？大家識好耐，同Rose嘅媽咪係用同一個髮型師，Rose亦成日上有線節目。」他表示已跟Rose聯絡，又揚言日後約會亦不會避忌：「之後都會一齊食飯，或者同埋Auntie一齊。」
提到當日為Rose搵新竇，「衞帝」卻與女友口供有出入，表示是帶Rose出席聚會，而非她解畫的「睇相」。再問他於生日派對攬住Rose纖腰滿場飛，他未有否認，只說︰「嗰日係陸浩明（無綫藝人）生日。」追問Rose是否他那杯茶，他似留後路，隨即與女友夾番Channel，異口同聲表示事業為先︰「啱唔啱依家唔知，暫時冇諗，做嘢先。（玩地下情？）呢個世界邊有地下情！」之後卻突然笑笑口彈出一句：「不過佢真係好細個。」
