沈卓盈煮意多多做大廚
沈卓盈（Jess）身材Fit爆，原來被網民稱為「沈大師」的她最愛品嘗美食，不時煮兩味顯身手！她自幼師承母親的廚藝，除了積極研製新菜譜外，更計劃推出烹飪書，變身美女廚神！
沈卓盈廚藝精湛，想炮製滋味西餐？No Problem！
Jess對美食甚有研究，美女廚神果然名不虛傳。
野菌魚柳三文治
步驟：1
用紙巾吸走魚柳水分，灑上適量黑椒、鹽及牛至粉調味備用，同時將白葱切片備用，只要白色部分。
步驟：2
魚柳落鑊前先掃上適量橄欖油，有助鎖緊肉汁。然後以橄欖油起鑊，起猛火，將魚柳煎至微焦，然後反轉魚肉，再放入大蘑菇，煎至八成熟。
步驟：3
將葱片落鑊，煎香後，將魚柳放在葱上吸味。翻轉蘑菇，煎約兩分鐘即可上碟。
步驟：4
將葱片置於最底，放上蘑菇及魚柳，灑上適量紅椒粉及香草碎調味。將魚柳及蘑菇切片，拌勻葱片進食，散發三重滋味！
番茄蜆肉扁意粉
步驟：1
洋葱切粒，車厘茄及蒜頭切片備用。同時，將扁意粉放進沸水中煮約5分鐘，過冷河後加橄欖油拌勻備用。
步驟：2
以橄欖油起鑊，將洋葱粒、蒜片及車厘茄炒香，然後將蜆落鑊略炒，倒入白酒，煮至蜆殼微張，即可夾起。
步驟：3
將扁意粉中放進白酒略煮，約1分鐘後，再放進蜆及番茄醬拌勻。
步驟：4
灑上適量鹽調味，上碟後再灑上黑椒，加菠菜葉伴碟。
馬浚偉
曾主持《大廚出馬》，並在節目中炮製鮑魚。他曾推出食療書，當中介紹的「六棵葱治感冒療法」，獲不少媽咪級網民推薦！
蘇玉華
早年在大受歡迎的節目《美女廚房》技驚四座，獲封「美女廚神」，其後乘勢推出烹飪書，分享下廚心得。
沈卓盈擔任新一輯《May姐有請》主持，但她絕非只站在旁邊翹埋雙手！自幼已愛入廚的她拿起鑊鏟，姿勢與實際兼備，她說：「細細個已經成日喺屋企同家姐玩煮飯仔，本來最叻係炒冷飯同煮即食麵，但屋企人個個煮嘢食都叻，連爸爸都會落廚，久而久之都學番兩手！」Jess最愛沈媽媽自家出品的豉油雞及炆排骨，但她透露自己最拿手是煮西餐：「鍾意食意粉同海鮮，西餐比較着重香草同配料，我成日都去超級市場搜羅唔同嘅調味料，然後同朋友一齊試菜，互相交流心得。例如今次示範嘅魚柳，本來諗住用BB菠菜做配料，但唔太入味，後來喺朋友建議下，決定改用白葱。」
向May姐偷師
原來她亦試過失手，曾把卡邦尼意粉的醬汁調得太鹹，又曾被魚腥味嚇得雞手鴨腳，但現已訓練有素，連劏魚亦駕輕就熟！首次參與飲食節目，Jess即把握機會從馮美基（May姐）身上偷師，廚藝更見進步，她說：「喺節目入面成個問題少女咁，May姐一邊煮，我就一邊問佢攞『貼士』，仲Keep起菜譜返屋企試！我最鍾意佢煮嘅西湯，因為西湯唔似中湯，一次過放晒材料就搞掂，煮嘅過程要講技巧，同埋佢煮嘅排骨都好好味！」她笑稱暫未有機會為男友下廚，但期望能推出烹飪書，由「沈大師」變身「沈大廚」：「依家開始儲緊食譜，但要慢慢嚟，再煮多幾味畀朋友攞意見，見到大家食得開心，真係好有滿足感！」
手勢一流顯功架
不少藝人都演而優則「煮」，如對食療甚有研究的馬浚偉及廚藝出色的蘇玉華都曾在節目中大顯身手！
惹味菜式輕鬆煮：野菌魚柳三文治
材料：連皮海鱸魚柳 1件（約200g）、有機大蘑菇 1隻、白葱 半棵、黑椒 適量、鹽 適量、牛至粉 適量、紅椒粉 適量、橄欖油 適量
番茄蜆肉扁意粉
材料：蜆 200g、扁意粉 500g、番茄醬 半罐、車厘茄 適量、洋葱 半個、蒜頭 適量、白酒 適量、黑椒 適量、鹽 適量、橄欖油 適量
身材Fit爆四圍食
沈卓盈主持經驗豐富，卻是首次參與飲食節目。新一輯《May姐有請》除了有May姐親自下廚，分享烹飪貼士外，兩人更會走遍大江南北，品嘗各種美食！得天獨厚的Jess未有發福，她說：「我鍾意食嘢，有次拍攝有成九道菜，我甜品都仲食得落！最緊要係，食完後要做運動，咁就唔怕肥啦！」她早前隨攝製隊到內地拍外景時，做足防疫措施，加上當時尚未爆發疫情，難怪她可安心大快朵頤！
