杏兒與Bosco雖然硬撐冇尷尬,但站到離行離列。

無綫昨日大晒冷拍宣傳大合照,造就一對過氣情侶胡杏兒和黃宗澤(Bosco)分手後首次正面交鋒,還擺杏兒、Bosco及其緋聞女友徐子珊這愛情三角錯上枱,刻意令三人站在一起,認真「冤家路窄」!雖然杏兒與Bosco齊指同場冇尷尬,但二人全程冇傾偈,更站到離行離列,寧願各自與身邊的馬國明及徐子珊吹水。

杏兒與Bosco雖然硬撐冇尷尬,但站到離行離列。

Bosco跟子珊雞啄唔斷。

杏兒則與馬國明吹水解悶。

無綫晒冷約360位藝員拍大合照。

無綫昨日於將軍澳電視城二廠大晒冷,為「Amazing Summer」及明年的巴西世界盃拍攝宣傳片及大合照,現場約360位藝員出席,但不少當家花旦小生包括陳豪、陳茵媺、鄭嘉穎、林峯、陳法拉和楊怡等均沒有出席。過氣情侶胡杏兒和黃宗澤,以及曾與Bosco傳緋聞的徐子珊則「冤家路窄」站在一起,似是無綫刻意擺二人上枱。未知是否一班花旦小生「失蹤」,蕭正楠及田蕊妮升呢站前排。

拍完即閃

杏兒與Bosco自去年暑假分手後,雖在去年台慶及今年3月的上海活動同場,但未有正面交鋒,今次二人卻站在一起,惟全程零交流,並刻意拉遠距離,杏兒全程與身旁的馬明雞啄唔斷,完全冷落Bosco,而Bosco亦與過氣緋聞女友徐子珊吹水。完成拍攝後,二人即急急腳閃人,無緣拍分手後的首張合照。

杏兒事後說︰「大家唔會尷尬,之前冇機會傾偈,同事梗係會見面。」問到是否放低這段情時,她說︰「咪咁講,冇咁嚴重,咪特登講呢句,大家冇嘢。」她坦言未有新男友,卻不肯講會否與Bosco復合,提到鄧萃雯被無綫封殺,杏兒指雙方應可解決。而Bosco則表示與杏兒在化妝間時點頭打招呼,他多次強調︰「係你哋搞成咁尷尬,根本冇嘢。」問到分手後首次近距離碰面的感覺?他說︰「都係正常做嘢,再合作睇公司安排。」問到是否已放低這段情,他說︰「總之依家做嘢為先。」談到有傳好兄弟林峯與女友吳千語結婚,他說︰「吓?結婚咩?冇話我知,如果係真會恭喜佢。」

老闆監場

談到與過氣緋聞男友同場,子珊說︰「咪玩我!冇嘢搵嘢嚟講,都幾耐喇喎!」老闆陳國強開完股東大會後,前來監場,她說︰「老細梗係喺度啦!每年咁多活動,唔通我唔使返工咩。」

對於雯女被封殺一事,她說︰「唔會啩,咁大件事?」她又否認今次拍攝是谷收視,而提到林峯結婚,她說︰「冇理由唔通知我,如果係真會戥佢開心。」另外,馬國明否認因升呢才被安排企中間,坦言因早前奪獎才此安排。

第一手消息請下載on.cc東方互動iPhone/iPad/Android Apps