陳豪Aimee歐洲行婚禮

現年42歲的無綫視帝陳豪與32歲前港姐冠軍女友陳茵媺（Aimee）於2011年拍劇《心戰》撻着，蜜運近兩年屢傳「婚訊」。據知陳豪已選定於歐洲行禮，貪其環境浪漫及可免受騷擾，投入享受最重要一刻，亦符合他的低調作風。

陳豪昨日接受電台訪問時大方承認籌備結婚：「細個以為自己會30歲結婚生仔，自己都想係，始終要組織家庭。（準備結婚？）真係準備緊！」問到會不會「秘婚」，待事成後才向外公布，陳豪笑說：「有呢個可能性，唔係唔想畀人知，只係唔想高調行事啫！」即使被笑如沐春風，心情大靚的陳豪說：「我行事低調，但行為大方，想保留私人空間，不過既然問到，又覺得冇必要收埋。」談到有否覺得是傳媒造就了他與Aimee？他說：「一開始就收到好多祝福，可以坦白講出嚟好開心，依家生活好簡單，唔使避忌。（依家係咪最開心嘅時候？）依家好舒服，佢想去邊都會同佢去。」對於有報道傳Aimee有孕，記者致電陳豪求證，他不置可否，態度有保留地說：「多謝祝福，結咗婚先講。有好消息一定會向大家公布。」

至於Aimee早前以「家事為由」突然辭演古裝劇《寒山潛龍》，據知將由林夏薇接演，而Aimee本月初於馬來西亞拍畢劇集《單戀雙城》後飛往加拿大，昨日即傳出有孕傳聞。

照飲涼茶冇戒口

據早前在馬國與Aimee合作的台前幕後人員對傳聞則眾說紛紜，有指與男友一樣愛飲咖啡的Aimee，於當地一反常態停飲，懷疑真的「有喜」，但有劇組人員表示她「發福」只因為食所致，又指Aimee全無戒口，涼茶亦照飲：「佢乜都照飲照食，完全冇避忌，所以先食到暴脹，我哋有提佢忍忍口。」更有演員表示Aimee期間曾提過自己月事到而不方便，亦照穿高跟鞋，及於沙灘紮紮跳拍照上載微博。

其實去年11月「雙陳」已被網友發現到法國旅行，未知是否順道視察環境。而陳豪早前先後豪擲3,300萬元購入4,000呎大埔比華利山別墅豪宅築愛巢，又向無綫表示要北上吸金，並開價30萬一集，擺明心急搵銀組織家庭。