陳國峰曾增磅至170磅,每日食足6餐。

早前有外國時裝品牌進駐香港時,「紅褲仔」外國兵團變身萬人迷,不少女士特地朝聖,其實論「大隻」,香港本土亦有代表!18歲開始健身的「巨聲幫隊長」陳國峰當之無愧,曾任健身教練的他更希望他朝能參加健美比賽!

陳國峰曾增磅至170磅,每日食足6餐。

「國峰隊長」自言擔任健身教練是苦差,最辛苦時曾日做16小時。

為達成參加健身比賽的夢想,陳國峰毫不偷懶,經常抽空操弗身形。

屈臂支撐

半蹲

箭蹲

掌上壓

椅上收腹

參賽《超級巨聲》,曾被封「胸肌王」的陳國峰,原來由細到大都是「排骨仔」,直至18歲才開始接觸健身,豈料一試便愛上!由於學生哥年代零用錢不多,他惟有獨自到俗稱「鐵館」的地方健身,他說:「以前大型健身室未咁普及,價錢太貴畀唔起,惟有去屋企附近嘅『鐵館』玩住先,嗰度比較舊式同細間,依家少咗好多啦,都執晒!」他自爆以前只有百多磅,連「鐵館」的前輩都看不過眼,下令他增肥練肌肉,但他「油浸都唔肥」,即使不停食肉及食飯亦無補於事,他說:「食到食唔落,之後就少咗玩喇,玩吓停吓咁。」

5年前,陳國峰再次「的起心肝」健身,練得一身肌肉的他其後擔任健身教練,卻引來同性疑惑,他笑說:「啱啱出道嗰陣真係有人懷疑過我係同性戀,好多人都覺得大隻等於同性戀,不過我唔係。」按道理,憑他的40吋雞扒胸,要拉客玩健身的確「話咁易」,但他指因工作壓力太大而放棄做健身教練:「做做吓覺得冇咩成績,又唔係叻嘅Sales,而且每個人要Meet嘅Target都幾高(即要追數),長期有太大壓力,所以就放棄咗。」

望做健美先生

雖然「國峰隊長」已放棄做健身教練,如今成為拉麵店老闆,但他透露尚有個未達成的夢想:「一直都想參加健身比賽,當畀個挑戰自己,我知比賽期間會辛苦,要嚴格控制飲食,連社交活動都要謝絕,成個比賽就似係走緊自己條路咁。雖然香港健身比賽冇外國咁蓬勃,但都好想試吓,當娛樂吓都好!」雖然暫未有望參加,但他一直沒有放棄操弗身材,已是老闆的他仍堅持每星期抽4至5日健身,果然如他的名言:「唔做過唔舒服!」

陳國峰周身肌肉,凡是雌性動物見到都心動,問到是否艷福無邊?他即耍手兼擰頭,一臉可憐地說:「冇啦,依家啲女仔唔鍾意大隻o架!覺得核突。我之前做健身教練又冇話特別多女仔客,可能唔夠靚仔啦!」雖然他自嘲「唔夠靚仔」,但他強而有力的臂彎及雞扒胸,確實能與外地時裝品牌的「紅褲仔兵團」一決高下!

五招搣甩鬼祟肉

現今都市人生活節奏急促,要一眾忙到癲的女士抽空到健身室健身,實非易事。陳國峰針對繁忙的都市女性,教授簡單5招,令女士在家中亦能Keep Fit。他表示每星期做3至4次,每次做15至20下,即見成效!

第一招:屈臂支撐

作用:收緊三頭肌(ByeBye肉)

注意事項:注意呼吸,用力時呼氣,挺胸收腹,別過分伸展肌肉。

第二招:半蹲

作用:收緊大腿肌肉及臀部

注意事項:小腿及大腿蹲成90度,膝頭不要超過腳尖,集中力量到臀部,挺胸收腹。

第三招:箭蹲

作用:收緊大腿肌肉

注意事項:注意膝蓋關節,膝頭勿過分向前,要與腳尖成水平。

第四招:掌上壓

作用:鍛煉胸肌

注意事項:注意肌肉運用及呼吸。

第五招:椅上收腹

作用:收緊腹肌

注意事項:注意呼吸,用力時呼氣,雙腳要保持伸直。