陳豪北上身價30萬人仔

無綫人才買少見少，小生都把握機會外闖，即使未有機會的亦等機會，就連花旦陳法拉亦被指扭計不續約，想去美國進修，再考慮與無綫以甚麼新形式合作，據知連楊怡亦有意外闖。而與無綫簽經理人合約的陳豪即將約滿，無綫亦急挽留，不斷叫陳豪傾約，希望加簽幾年。不過陳豪眼見林峯及鄭嘉穎都到內地拍劇，叫價更高達50萬元人民幣一集，剛以3千多萬元購入獨立屋，並打算跟女友陳茵媺（Aimee）結婚的陳豪自然心癢癢。雖然他現於無綫拍劇有5萬港元一集，但於內地叫價已高達30萬元人仔一集，令他打算請假接拍內地劇。

另外，據知無綫藝員部一直有找陳豪傾約，不過他似乎心大心細，未肯正式答應。為氹掂「筍盤」，無綫不得不諗計，決定安排陳豪與黎耀祥合作的劇集《傳愛事務所》作為今年的台慶劇，令於2007年攞過一次視帝的陳豪分分鐘憑「續約」為籌碼，再膺視帝。據可靠消息指，陳豪已傾掂一部內地劇，稍後便會北上開工。

樂易玲認未傾掂

記者昨日致電給無綫高層樂易玲，問到陳豪及楊怡是否即將約滿、並正傾續約？她說：「傾咗好耐，包薪藝員合約向來唔會等約滿時先傾，我哋耐唔耐都會叫佢哋傾，有啲未滿就已經『加監』。林峯就嚟約滿，但佢仲忙緊拍劇，未有時間傾。」提到陳豪欲拍內地劇，樂小姐坦言他的確想請假外闖：「佢拍咗咁多劇，想拍吓內地劇同電影，所以TVB幫佢傾緊內地劇，時裝、古裝都有。」

楊怡昨日坦言一直有與公司傾約，問到是否將約滿？她說：「差唔多喇！（傾約有乜要求？）淨係想瞓覺，依家日日拍劇拍到暈。」她又笑言想外闖。