陳豪慣咗飛紙仔

陳豪在《金枝慾孽貳》中唱崑曲被批評，對於收視最低僅19點，不着重收視的他指這是個人喜好問題：「收視低唔代表質素差，戚其義（監製）、周旭明（編審）係藝術家，佢哋嘅劇唔會很平、很白。但身為演員，我幾享受，幾鍾意個結局。」他坦言起初接受不到崑曲，但現時多了一份欣賞：「唔好怪我，呢個係天生缺陷，之前師傅都話我只學到皮毛，啲人話唔鍾意我劇中把聲，但啲大老倌講嘢係咁，要錫聲同養聲。」

時機成熟娶茵媺

對於戚其義近年的大製作都贏口碑輸收視，但每次都給藝人無限挑戰，陳豪說：「我開心o架！我希望求變，唔想原地踏步，要做一啲成功但不停重複嘅嘢，嗰個唔係我。（出去接佢嘅嘢拍？）我視佢同周旭明係一個團隊，同佢哋合作係遲早問題，都會嘅。（鄧萃雯寸爆指零劇本？）我哋第一集時都係咁，飛紙仔並唔係冇劇本，我哋收到嘅劇本已經改咗8、9次，周旭明注重對白，執到最尾嗰刻先畀監製，再畀我哋，對某啲演員有劇本係舒服啲，我拍電影出身，都係咁長大，因人而異。」說到被指買樓預備結婚，陳豪笑言要看上天安排，問到向女友陳茵媺求婚未？他說：「上天安排啦！（你Ready好晒？）等時機成熟。」

此外，韋家雄及龔嘉欣昨日出席電台訪問，韋家雄坦言劇集是否成功不可以收視來衡量：「我哥哥（韋家輝）當年套《大時代》收視得26點，之後咪叫神劇，呢套劇需要思索，師奶可能睇慣即食麵。」龔嘉欣坦言首次嘗試飛紙仔，當作考試般，但兩人坦言拍時很清晰，劇本在拍攝前已有，並不是冇劇本，每個演員都一視同仁，更指向來很多電視劇、電影都是飛紙仔。