鬱獄 Alice B. 周秀娜Prison Break！

混血模特兒Alice B.於2011年拍攝相機廣告後人氣急升，憑高挑身形加上甜美外形，俘虜一眾宅男。去年Alice母親不幸患上肌肉萎縮症，年底更病情惡化，心疼的Alice情緒低落兼暴瘦至不足100磅，其後患上抑鬱症，病情嚴重時甚至在家中崩潰濠哭。

猶幸隨着母親的病情好轉，Alice亦重拾笑容，走出情緒陰霾的她表示，患上抑鬱症期間曾就醫，不過從不依靠藥物：「我淨係選擇同醫生傾，因為我知抑鬱症病人要靠自己走番出嚟，心理醫生幫我解開咗心結，而且令我更了解自己問題所在，知道自己嘅長處同搵番值得開心嘅嘢！」

Alice以「Fantastic（好到極）」形容一直在身邊默默支持的家人，亦是令她重新站起來的重要原因：「好感動屋企人同朋友都畀咗我好多『愛』，呢樣好重要！」家人亦是她的「死穴」，全因他們一起經歷過高低起跌，令她更珍惜家人：「屋企幾經風雨，我哋唔係有錢人，所以只會用我哋有嘅嘢嚟解決問題。」除了家人，她亦愛以畫畫及跳舞等興趣對抗負能量，而愛貓亦擔當她走出抑鬱的重要角色。

對貓癲叫高歌

Alice說：「除咗屋企人，得寵物先會永遠愛你，我隻貓最明白我，我唔開心時會嗲吓我，氹番我開心！」不過愛貓聽得最多的，除了主人的秘密，還有她瘋狂大叫的歌聲，Alice笑說：「我好鍾意大大聲唱歌抒發感情，最鍾意嘅歌係《I Gotta Find Peace Of Mind》同埋《I Get Out》，一大聲唱就覺得超爽，有時我都覺得極似癲婆，哈哈！」

俗語有云：「屋漏更兼連夜雨」，Alice過去一年經歷母親患病、自己患上抑鬱症，以及與富二代男友分手，生活幾近失去重心，理應希望有另一半陪伴，不過她卻斬釘截鐵表示不希望以愛換取幫助：「我樂於接受朋友幫助，但從來唔會利用男人，我相信真愛，唔會用愛換取安全感或者幫助！」而前男友曾主動伸出援手，問到會否復合？她非常保護前男友地說：「佢同佢屋企人都幫過我，所以我想尊重番佢哋，唔會再答我同佢嘅問題。」

入行短短5年的周秀娜由模界殺入電影界，深受「宅男」歡迎。出名EQ高的她，面對尖銳問題時仍笑面迎人，回答大方得體，但娜姐坦言壓力大得有過自殺念頭：「好彩只係一剎那之間！我對自己要求好高，只要達唔到標準，就會勁大壓力！喺香港出到街行慢啲都會畀人趕咁，搞到自己都驚落後少少就畀人趕過！啱啱開始拍戲時，日日唔開心，成日諗自己場戲同角色，覺得自己做戲差，甚至唔敢面對，試過喺片場匿埋唔理人，不過後嚟學識面對，知道下次會Prepare得更好，識從失敗中學習。」

慘戲情傷夾攻

近年忙於在外地拍劇、拍電影的娜姐，因獨自流落他鄉而倍感寂寞：「每逢過時過節我都覺得寂寞，試過喺酒店得自己一個時同枕頭傾偈。加上有段時間不停拍鬼片，自己成日疑神疑鬼，試過同經理人講要停一停，等情緒改善先繼續。之後拍電影《紙月亮》同內地劇《葉問》演繹慘角，入戲嗰陣抽離唔到，嗰段時間情緒更差。」

今年初娜姐宣布與拍拖6年的髮型師男友Avis分手，更有傳她因此厭食暴瘦，雖然娜姐作出否認，但坦言曾經情緒低落：「分手唔開心係人之常情！以前我有諗過同對方結婚生仔，但發現鍾意同可唔可以一齊係兩回事，既然感情事唔係自己把握到，不如專注事業，起碼可以靠自己努力前進！」

搞Gag打拳發洩

面對感情挫敗時，娜姐仍要回答公眾的尖銳問題：「入得娛樂圈就預咗要同人交代，冇人追訪咪仲驚！」對於如何跨過情傷時期，她灑脫地說：「我寄情工作，嗰排同杜汶澤合作笑片《爛滾夫鬥爛滾妻》，佢成日搞爛Gag，晶哥又不時萬歲請食飯，大家畀咗好多正能量我！加上我迷上打拳，不停做運動發洩，過吓一日又一日，時間真係可以沖淡一切！」

擁有32D「胸」湧上圍的娜姐，不但睇得更打得，即使腳部韌帶撕裂，仍堅持拍打戲！雖然她外表堅強，其實渴望有人愛錫，她笑言自小在嚴母的體罰下變得獨立堅強，卻因不懂得「小鳥依人」而「蝕章」：「我唔識開口叫人對我好啲，但唔等於我唔需要！不過我已經學緊適當時要依靠吓人，其實我都渴望有拖拍！」

後記：面面俱圓撈起

專訪當日娜姐不僅準時，更早已化定妝、換定衫，當小記發現她右耳耳背的紋身時，她笑說：「之前有記者唔知，仲以為我耳仔污糟咗！」讓因不知情而尷尬的人有下台階。訪問完畢她「唔該」前「唔該」後，如此懂人情世故，難怪在圈中吃得開！

甜姐兒Add Oil

上月初Alice接受本報訪問時，面容憔悴，上圍大縮水，身形及面頰瘦削。事隔一個月後再受訪，明顯增磅的她精神飽滿、笑容滿面。她現時最想專注陪伴家人及愛值得愛的人，這些都能令她「Add Oil（加油）！」