陳山聰雙手合十，不欲多講感情事。

陳山聰與何超雲分手，外間相當關注山聰分手後的去向，據知山聰已有計劃，但為了自尊故沒有主動向無綫搵工，其昔日好友伍詠薇及陳敏之，均未有就其去向加意見，至於山聰好兄弟郭政鴻，則表示二人「分手」並未影響其女兒與超雲的契母女關係！

陳山聰雙手合十，不欲多講感情事。

與富貴超雲分手後，山聰返回麗晶花園居住。

李添勝指男女之間的事，外人難知內情。

伍詠薇表示睇新聞才知山聰與超雲分手。

陳山聰與何超雲拍拖以來一直不被看好，早前兩人傳分手，超雲避走英國，其後山聰到當地「箍煲」，雖然先後被拍得一起出入的照片，但原來「復合」之說只是假象，昨日超雲在Facebook上把Status改為Single，間接宣布與山聰分手，山聰即時變成「無依無靠」。

山聰拍完劇集《天梯》後便暫停幕前工作，專心與超雲拍拖，現時與超雲分手，卻沒有工作令人擔心。據知山聰自尊心重，暫未有主動向無綫搵工，而他亦對未來有計劃。一直力撐山聰的好兄弟郭政鴻，昨日透露身在內地，談到山聰與超雲分手，他表示應由山聰回答，問到其女兒是否還是超雲契女，他說：「一定係！大家關係一直都Keep住友好。」

伍詠薇懶得理

曾與山聰交情深厚，但現時已交惡的伍詠薇，昨日出席公開活動時，談到山聰箍煲失敗時笑笑口說：「又關我事？我唔知喎！都係睇新聞先知，我同觀眾係同步知道消息，我由頭一日開始到依家都對佢哋冇意見，人哋嘅私事又冇參與，不過都希望佢開心。（歡迎佢返公司拍劇？）邊個返嚟都想。」陳敏之則坦言雙方向來沒甚聯絡，亦不知對方已返港，更說：「佢嘅感情事我唔回應，佢想法係點我亦都唔知。（大家關心佢之後點！）希望佢真係可以搵到條路係點行，衷心祝福佢。（覺得佢做返幕前，定係做時裝好？）佢自己鍾意啦！我畀唔到咩意見。」

唔可以做情聖

至於《天》劇監製李添勝被問到會否預留角色給山聰，他說：「佢老人家係做得戲，不過如果佢要返公司，第一個唔應該搵我，係樂易玲小姐，佢嘅戲係冇問題，就算之前拍拖，入廠拍戲都專業，熟劇本先，唔係Hea住做。」

添哥更慨嘆指男女之間事，若非在當時人床下底，根本不知箇中原因，又說：「雖然佢想事業愛情兩得意，但未必係心中所想。（覺得佢應該揀愛情定事業？）我唔敢同人揀，佢係可造之才。（有咩角色啱佢？）佢踏入中年，首先要減肥先，唔可以再做仔情聖角色，轉做性格演員啦！」