阿叻寸志偉腳短如腰圍
一連三場的《區瑞強好友情演唱會》前晚在伊館順利完成，尾場爆滿之餘更獲著名音樂人捧場，嘉賓陣容亦相當強勁，其中陳百祥（阿叻）在台上喪開阿倫與志偉的玩笑。
阿叻（左）擔任區瑞強的個唱嘉賓，大放笑彈。
父子難得合唱，區瑞強感動到喊！
區瑞強開騷，曾路得梗撐！
森森（右）與斑斑保養得宜，被區瑞強笑指食防腐劑！
民歌王子區瑞強（Albert）騷上施展渾身解數，除了獻唱多首中外名曲外，還與觀眾玩遊戲，送出自製的簽名結他，心情大靚的他又自言與譚詠麟（阿倫）一樣年年25歲。嘉賓包括森森、斑斑、羅大佑與曾路得等唱得之人，阿叻亦有上台與Albert合唱《昨夜的渡輪上》，博得全場掌聲。席上，Albert透露經常到阿叻家作客，阿叻亦指對方是他的伯樂，並即場搞爛Gag：「我45歲時Albert搵我唱第一首歌，阿倫淨係識唱歌，所以我讓唱歌畀佢，但講到跳舞我肯定好過佢。」及後，他又笑阿倫經常在演出時穿鬥牛背心，讓人錯覺他成功減肥，令觀眾笑聲不絕。
笑完阿倫，阿叻再拿另一老友曾志偉開玩笑，他自言以前與Albert一樣是30吋腰圍，現在卻跟志偉一樣是36吋：「不過我係長褲，志偉係短褲！有次我喺服裝間聽到有人問志偉腰圍同褲長，志偉答兩樣都係36吋，咁同條毛巾有咩分別？」全場觀眾笑爆嘴。其後，阿叻再獨唱經典英文歌《Smoke gets in your eyes》獲全場拍掌支持，觀眾讚唱得好聽過阿倫。
唔反對入樂壇
至於Albert的一對兒子亦有上台與父親合唱，搞到Albert感動得眼泛淚光。完騷後，Albert受訪時表示兩子唱功不俗，不反對他倆選擇以唱歌為職業，更會給予提點。問到個唱反應好會否考慮開Part 2？他坦言未有計劃：「伊館要一年前預約，而且嘉賓時間要夾，但我好多朋友，如果要開廿場都得。」
