陳淑芬發火封殺壹傳媒

不經不覺已有五年沒有聽到「開心果」肥姐的招牌笑聲，今年六月一日，肥姐生忌，一眾生前好友於紅館舉行《開心果永遠欣想妳演唱會》悼念肥姐。昨日主辦機構之一負責人陳太與肥姐愛女鄭欣宜、肥姐契仔張學友、曾志偉及汪明荃等出席記者會。對於被《蘋果日報》指「掠水」，陳太坦言有因此不開心，問到可覺被冤枉？她說：「佢（何守信）係話如果有人用紀念活動嚟斂財係遺臭萬年，嗰位一定唔係講我，而係執筆同炒作嘅人遺臭萬年。（向何守信了解？）唔需要，根本唔係講我。」

陳太重申早前為哥哥舉辦紀念音樂會是為了圓歌迷心願，並指這份大禮落重本絕不馬虎。愈講愈激氣的她更向多次失實報道的壹傳媒集團「宣戰」：「我決定以後我主辦嘅活動，壹傳媒旗下蘋果日報、爽報、壹週刊、忽然1周、FACE都唔歡迎佢哋嚟採訪，因為佢哋唔係報道真相，反正佢哋都係作，歌迷要睇就睇其他報紙。」而何守信對陳淑芬的言論亦大表認同：「佢冇講錯，當日我確實唔係講佢，我只係針對事，冇針對人。」

學友驚肥姐回魂

老拍檔汪阿姐大讚肥姐敬業唔計較，希望欣宜能將肥姐的開心精神延續下去。志偉則取笑學友在個唱上將會「霸住支咪唔放」，學友則寸他：「啲人過咗60歲，講嚟講去都係嗰啲嘢。」學友又不敢爆肥姐的報夢內容，怕多口而觸怒肥姐回魂兜巴星：「我成日都見到佢，喺電視見到佢呀！夢就少啲，我唔敢講咁多，驚肥姐返嚟『星』我！」

至於欣宜希望能上台扮媽咪：「我有時不經意講嘢啲語氣好似媽咪。」她出席另一活動時表示，何B未了解演唱會細節而誤會：「我知佢好錫媽咪，但個騷可能會蝕，有賺就捐畀慈善機構。」至於有傳鄭少秋不獲邀請，她表示秋官屆時不在港。