嘉欣焗合照反拍疑哂V警

李嘉欣（Michele）與老公許晉亨雖早前踏入「七年之癢」，但仍經常在微博大晒幸福，實屬圈中模範夫妻！廿四孝老公昨日擔任Michele的的御用「柴可夫」，駕駛價值數百萬港元的跑車接送Michele四圍去，怎料途中涉嫌超速而被交通警截查，即場食「牛肉乾」。Michele昨日在微博「打卡」透露身處葵青區，指執勤中的交通警與自己合照，在車內的Michele更捕捉交通警「調皮」疑似「晒V字手勢」的一刻，但就未見上載嘉欣所指的「合照」，細心的Michele亦為警車車牌「打格仔」，並留言：「老公超速被抄牌，交警和我合照！老公非常不滿。」更附上三個哈哈笑公仔！

網上瘋傳

留言一出，網友即議論紛紛，連帶不少警務人員網上討論區亦瘋傳該照片，成為熱話！有警察交通部沙展向本報表示該警察行為不恰當，因警察執勤期間應保持嚴肅態度：「雖然個警察咁做唔構成刑事行為，但估計會畀上司責備，勸喻佢執行時要檢點啲！別太兒戲！」他又補充：「交通警執勤期間要求與名人合照有可能畀人質疑係咪有踩界濫用職權之嫌，佢當時身份係代表警方同法律，被票控嘅人係嫌疑犯，佢咁做會畀人感覺被迫就範合照，唔同你平時喺街撞到同名人影相咁。」

另外，Michele繼日前出席活動後，後日（5月2日)將出席全城熱話的「橡皮鴨（Rubber Duck）」活動。已育有一子的她對復出大銀幕似乎興趣不大，其經理人陳善之昨日接受電話訪問時說：「佢現階段都放喺囝囝Jayden同家庭身上，佢唔想錯過囝囝每一個成長階段！（有好劇本都唔拍？）應該都唔會！（生多個？）咁我哋又冇傾過！」對於Michele與交通警合照一事，他表示不會干涉藝人的私生活。