許雅婷處女戲壓力爆燈

年僅18歲的周秀娜師妹許雅婷（Kabby）最近處女下海拍攝電影，青春可人的她扮演倔強反叛少女，甚具挑戰，幸得「媽咪」溫碧霞提點，並獲對方掃背揼骨服侍，認真萬千寵愛在一身！

現年18歲的新一代「靚妹仔」許雅婷（Kabby）在小學及中學時期已是活躍分子，積極參加話劇、合唱團及朗誦，表演欲爆燈，並培養出樂觀開朗的性格。最近她首次參演電影，於《靚妹仔》2013年版本《微交少女》中飾演溫碧霞（Irene）的反叛女兒，有不少鬧交及發惡戲份，挑戰難度：「角色同我性格唔同，佢好沉默倔強，好似個個都得罪咗自己咁，現實嘅我咩都同人分享，都幾樂觀。」

唔敢打招呼

首次正式演戲的Kabby表示只得一星期揣摩劇本，壓力甚大，又擔心處女作「甩轆」影響前途，因此緊張得失眠，幸有「媽咪」Irene對她照顧有加，像親生女般看待：「第一次見面我緊張到唔敢打招呼，但佢開解我，話搵我做就係因為我夠模，戲入面我哋成日鬧交，我開頭唔敢，佢就叫我放膽鬧佢！Irene姐知我唔舒服，仲幫我掃背揼骨，又關心我嘅工作同家庭，真係好Nice！」

形象清純的Kabby表示，這次演繹與Irene的母女情，過足戲癮。提到同片尚有另外兩名青春女新人，包括「魔鬼胸」蔚雨芯（Rainky）及Super Girls成員Heidi，但她不怕被搶鏡，認為三人各有優點：「Heidi好得意好玩得，我哋好好傾，同Rainky就冇咩對手戲，只係見過兩次。」