糖兄妹谷爆要尋歡

組合糖兄妹最近工作多多，兩人壓力爆煲，一個不能錄音，一個失聲，非常慘情！幸好兩人懂得苦中作樂，推出新歌曲尋快樂！他們出道多年，竟然沒有記着組隊紀念日，惟有出口術向粉絲道歉！

糖兄妹一向等同正能量，但最近密密做的二人坦承壓力爆煲，令錄製新歌的進度受阻。黃山怡（糖妹）說：「拍劇嘅生活日夜顛倒，休息唔到，到我去錄新歌嗰陣，把聲完全不在狀態，然後我就諗：『落去食完嘢先再錄啦！』」潘雲峰（糖兄）亦大呻：「到糖妹準備好錄新歌嗰陣，就到輪到我失聲！仲要持續咗兩個禮拜！可能因為感冒搞到咁，嗰排真係好忟，最後遲咗成個月先錄完！」

跨地域音樂合作

即使有不如意的事，亦有辦法解決，他倆便選擇推出新歌「尋歡」！糖兄說：「新歌主要想同大家講點樣可以理性地得到快樂，曲風比較成熟，唔再係初出茅廬嘅少女Feel！」糖妹亦說：「依家做緊另一個音樂計劃，同緊台灣歌手范曉萱、蔡健雅、日本歌手赤秋音、崔恕老師合作出歌，有唔同嘅嘗試，好開心！」

糖兄妹出道多年，竟無心記着組隊紀念日，糖妹問：「係幾時嘅事呢？好耐喇！我哋正式運作係2008年，不過幾多號就唔記得！」糖兄亦說：「我哋前排先講過呢件事，你當我哋四月左右啦……」

幸好有Fans自動波提醒他們，兩人即向粉絲耍冧：「其實每年都有粉絲Send Message提我哋就嚟要慶祝，真係要多謝佢哋！」