鵬哥詹Sir向正版下戰書

現年71歲的「扮嘢宗師」盧海鵬即將聯同詹瑞文舉行扮嘢騷，實行「笑Sing」震紅館！首度在紅館搞騷的鵬哥除扮盡香港經典歌手外，還有意找真身上台比併，更揚言：「第一次踩上紅館唔衰得！」

有「扮嘢宗師」之稱的盧海鵬，將於6月與詹瑞文攜手殺入紅館，舉行 一連兩場《盧海鵬X詹瑞文紅館奇幻扮嘢大典》，製作人丘亞葵表示作為「扮嘢宗師」的鵬哥與「扮嘢大師」的詹Sir同台演出，肯定會笑爆肚！問到兩雄相遇可有拗撬，丘亞葵說：「冇，係詹Sir提議搵鵬哥，因為佢好尊重鵬哥，除咗向宗師致敬，亦想挑戰佢！」

首踏紅館唔衰得

他還率先踢爆二人的神秘造型：「佢哋會扮好多明星，包括徐小鳳、達明一派、Psy、四大天王同畢彼特等，仲有意搵正版達明同小鳳姐上台對撼！」問到會否擔心鵬哥失控爆粗「試咪」，他笑說：「今次係扮嘢歌舞騷，佢哋會邊唱邊跳，我哋都有計劃過搞『試咪』，唔怕鵬哥當眾爆粗，因為佢好專業，另外又會有啲煽情環節。」

問到年屆71歲的鵬哥有否特別要求，丘亞葵說：「佢只係要求我哋早啲畀歌詞、音樂同造型，佢話要記歌詞，同埋要啲準備，第一次踩上紅館唔衰得。」他還計劃招攬全球扮嘢高手，又想邀請鵬哥弟弟盧海潮玩埋一份：「佢喺廣州好有名氣，同鵬哥好似樣o架！」