Ada趕出關Set頭谷收視

蔡少芬（Ada）早前閉關坐月，被迫缺席新劇《金枝慾孽貳》宣傳，昨日細女張信兒滿月，期滿的Ada即出關！產後谷奶未收身的她與老公往髮型屋整頭，執定靚樣為收視低開的《金》劇造勢。

蔡少芬（Ada）上月剖腹誕下細女張信兒，坐月期間她乖乖留在家中湊女。昨日信兒滿月，坐月期滿的Ada即第一時間破關而出。昨晨11時半，老公張晉做其湊女公，先接載大女兒張楚兒回家。穿上背心大騷麒麟臂的他，駕駛七人車返回元朗寓所。他抱着女兒下車，還為囡囡孭着小背囊；精靈的楚兒則手抱兩隻公仔不停錫，極為可愛！約一小時後，Ada與老公雙雙離開寓所。身穿灰色鬆身衫、頭戴和老公同款灰色情侶Cap帽的Ada，雖素顏上陣，但精神奕奕，上圍明顯谷奶升Cup，仍未收身，還凸出大肚腩。兩夫婦上車後直駛中環，駕車的張晉去到中環時正值繁忙時間，一度因Cut線問題險與另一車輛發生碰撞，幸兩車及時煞停。

趕返歸煲劇

而戴回口罩的Ada下車後，與老公十指緊扣步往髮型屋，問到會否為細女擺滿月酒，她笑笑口說：「唔啦！百日宴就未決定。（唔帶BB出嚟？）今日好熱呀，唔帶佢出嚟喇！」抵達髮型屋後，他倆進入VIP房，Ada最終逗留足足五小時才離開，看來扮得靚靚的她隨時準備為有份主演、但收視欠佳的新劇《金枝慾孽貳》埋位宣傳。離開時，Ada被問新劇播出收視不理想，她坦言不相信受苟姑娘被指是小三事件拖累：「唔關事！收視講天時地利人和，希望大家都支持啦！（幫手宣傳？）會！遲啲都會出嚟，我晚晚都有追o架，依家都趕住返屋企湊女兼睇《金枝慾孽貳》囉！」

另一邊廂，關禮傑在《金》劇中反串花旦唱崑曲被網民激讚造型艷麗。日前穿鮮紅色西裝及打煲呔的他，與友人在中環酒吧暢飲時，不少顧客認出兼包圍他合照，被捉住當布景板狂影一輪後，他與友人摸杯底，逗留約一小時才走人。

而資深藝人孫季卿在《金》劇中飾演黃德斌父親，有網民發現其頸上生了巨型腫瘤，原來幾年前他左頸後生了脂肪瘤，無綫外事部副總監曾醒明稱藝員科早已知悉：「有叫製作部同事畀啲輕巧啲、唔使捱夜嘅工作佢做。（TVB因健康理由叫佢退休？）唔會，佢係簽特殊合約，即係佢鍾意做就做，唔係死約，公司不時有同事問候佢身體狀況。」