林峯連講七次好愛BB

林峯前晚借傳媒隔空向女友吳千語連講七次「好愛」，作為今後封口不再講戀情的完美句號！千語BB昨日則連續回贈七次「多謝」，但拒公開對峯峯講「我愛你」。

林峯前晚錄影無綫《勁歌金曲》時表示有事宣布：「公開戀情後，大家實在太關心！我哋唔想次次回應傳聞，今次係最後一次講戀情。我好愛、好愛、好愛、好愛、好愛、好愛、好愛BB！今後想將BB、屋企人同佢屋企人放心中，我同女友都唔想再回應，想將焦點放番喺工作，希望大家諒解！（傳你兩年內結婚？）冇咁嘅計劃。（千語話求婚要有驚喜？）呢層當然！（佢讚你係好男友？）佢喺我心目中係滿分！」

峯峯愛得甜蜜，卻以「唔講無聊話題」拒回應有關舊愛潘霜霜的問題，對於打入福布斯中國名人榜第72位，他說：「近年收入係有增長，但高估咗我啦！（傳你掛住冧女，激嬲內地導演？）我係有報到，但大家知我工作積極！」

財政獨立

另一邊廂，千語昨日出席活動時，提到愛郎的「七愛論」，她尷尬地說：「咁我都講番七次多謝！（講夠八次，贏佢？）唔敢，怕醜！我都係第一次聽佢講咁長。（佢愛你愛到狂？）唔回應，佢都話最後一次講。（佢入福布斯？）個榜講好多嘢，對傳媒影響力咁，現代人財政獨立，我哋冇交代過身家，我連大Limit（額）信用卡都冇！（想峯峯送？）大家知佢錫我，但唔係呢種方式。」