赴美巡唱未驚過 基仔喪食谷老鼠仔

英皇歌手古巨基將於明日飛往美國大西洋城舉行巡迴演唱會,雖然早前波士頓發生恐怖襲擊,但他自言未有擔心:「完全冇驚過!行程一早安排咗,我個騷喺美國當地時間27號先做,今次我仲喺演唱會中特別加咗Part向哥哥張國榮致敬,因為今年係哥哥逝世10周年,到時會唱三首哥哥嘅金曲。」

由於連日來忙於排舞及健身,基仔自爆可名正言順放縱大吃大喝,他笑說:「因為健身教練話我瘦咗,我要操番兩隻老鼠仔出來,所以呢排可以狂食肉同蛋白。」雖然久未排舞,但他笑言跟舞蹈員一埋位,便自動波手腳合一跳起來。

古巨基勤練臂力,希望出發前谷出老鼠仔!

基仔為美國巡唱苦練「舞」功,令人期待。