講對白似急口令 葉翠翠遭網民圍插

新劇《金枝慾孽貳》前晚首播，但收視平均只有25點。網民讚鄧萃雯保持一貫好戲支撐大局，蔡少芬也夠壓場感，但批評劇集節奏慢，葉翠翠更被插演技差及對白講得快！苟芸慧的廣東話繼續被人詬病，網民指要看字幕才明白。至於一班《金枝貳》演員前晚相約唱K睇首播，包括伍詠薇、陳豪、黃德斌、關禮傑、苟芸慧、葉翠翠及監製戚其義等。陳豪被記者問為何自備飯盒到場，他只懂尷尬傻笑，幸好黃德斌幫口解圍。

眾人盡興到凌晨三時帶醉離開，但伍姑娘與簡慕華、苟芸慧及梁嘉琪等卻轉到酒店大堂，原來伍姑娘早已準備酒店房讓「女子組」過夜談心，她受訪時說：「食完嘢、唱完歌咪一班女仔上酒店房瞓喺床繼續傾。（尋晚你請客？）唔係！係酒店朋友贊助，我只係做福利官幫大家爭取。（雯女冇到？）佢應該要做嘢，因為約得幾急，下次啦！（網民彈節奏慢？）呢套劇要煲嘅，唔好咁快下定論。（收視得25點？）差唔多，我都滿意自己演出。（葉翠翠同苟芸慧演得差？）佢哋演得好好喎！」而被網民狂插對白太急的葉翠翠說：「可能呢套劇要鬧人，有時講對白快咗，嚟緊會留意。」