小儀氹玄彬除底橫

韓劇《秘密花園》男星玄彬，前晚在港舉行首個見面會，司儀小儀於台上抱抱型男，又大爆玄彬喜歡在家中半裸兼暢談他拍咀戲的準備工夫，令玄彬相當尷尬。

韓國男星玄彬的亞洲巡迴粉絲見面會前晚移師九展舉行，全場爆滿。他獻唱《秘》劇插曲《那個男人》為活動揭開序幕，司儀小儀透露，玄彬不太適應香港的天氣，鼻敏感發作。小儀甫見玄彬即上前索抱，當聽到玄彬表示欲私下來港，她即自薦作嚮導，但玄彬即改口說仍未確定遊港計劃，慘食檸檬的她即大爆對方秘密：「佢鍾意喺屋企淨着內褲，點解你唔除埋？」玄彬即尷尬地說：「冇諗過呢個問題。」小儀着他試試，笑言可能會有意想不到的放鬆。

小儀又問他拍咀戲的事前準備工夫，令他面有難色，又提議他用脷捲着車厘子練習。玄彬於粉絲提問環節要求小儀走到山頂位問粉絲問題，粉絲大多要求合照，他未受泰國遭強吻事件影響，有求必應，甚至應要求生硬地跳大熱的Gwiyomi舞步。

抽水嫌未夠喉

此外，現場又大玩選妃，由玄彬揀出10位與《秘》劇中河知雲角色相似的幸運兒上台，與他握手兼抱抱。「細細粒」陳嘉佳特意借來一件白色衫，但穿不上只掛在頸上，結果被叮走，她受訪時說：「我由《我係金三珣》開始鍾意佢，可惜上唔到台。（做乜唔叫小儀幫你影合照？）我演技咁好，第日實有機會合作！」狂抽玄彬水的小儀昨晚笑說：「未抽盡，我好Enjoy。」對於大爆玄彬在家中愛齋着底褲，她笑說：「係大會嘅題目，唔係我點知？但叫佢除底褲係我臨時發揮，佢呆望住我個眼神勁Charm！」另外，玄彬於昨午返韓，吸引逾百港迷送行，場面墟冚，他仍不忘為粉絲簽名留念。