伊健早生貴子嗌No

「浩南哥」鄭伊健前晚於澳門舉行演唱會，蒙嘉慧（YoYo）首度與老公同場，當全場高呼「大嫂」時，她即忍不住冧爆甜笑。好友楊千嬅及錢嘉樂等亦趁機向伊健「催生」，令他哭笑不得！

鄭伊健前晚於澳門舉行演唱會，老婆蒙嘉慧（YoYo）自婚後首次現身撐老公場，好友錢嘉樂及林曉峰（阿Lo）亦分別攜眷出席。甫開場，身形Fit爆的伊健大騷誘人肌肉，並演繹多首金曲，令全場粉絲尖叫不停！同場又播出楊千嬅早前拍下的短片，除祝福伊健及YoYo新婚快樂外，更以人母身份向伊健「催生」，台下的粉絲亦「加把口」，令伊健哭笑不得。

嘉樂做嘉賓有福氣

「古惑仔」錢嘉樂及阿Lo與伊健合唱《友情歲月》炒熱氣氛，嘉樂又識做地說：「做伊健嘅嘉賓好有福氣！上年做完就結婚生女，再拎金馬獎，金像獎又有提名！」而阿Lo憶述三子的往事，又感慨大家現已成家立室，現場隨即影着YoYo，鬼馬的嘉樂即率領觀眾向YoYo高呼「大嫂」，而她亦冧爆甜笑。

完騷後，伊健再次感激千嬅贈言，問到可會「承嬅貴言」早生貴子？他說：「唔好啦！睇吓身邊人點先啦！既然千嬅咁講就放長雙眼，順其自然啦！」談到全場大嗌YoYo「大嫂」時，她冧爆甜笑，伊健欲扯開話題：「兩個阿嫂都有笑有點頭呀！笑得多有眼紋o架！」另外，問到好友郭富城與熊黛林難敵「七年之癢」，伊健即「護城」說：「佢開心就得啦！」