Naomi Cammi 整形雙嬌開火

所謂「女為悅己者容」，在女藝人眼中，變靚更是終身職業。先天不足，惟有靠後天「整」救，難得謝芷蕙（Cammi）及馮鎵瀠（Naomi）敢整敢認！前者發起「模國界整容聯盟」，縫上七針變銷魂眼；後者則抽脂升Cup，自拍Share「超級Big波」。兩位人造「雙Mi」先鬥靚再鬥寸嘴，隔空互踩冇身材、冇學識、冇修養。

現年28歲的馮鎵瀠（Naomi）去年接受隆胸手術，上圍瞬間由B Cup變C Cup！由於是以自體脂肪隆胸，她透露手術前要先增磅儲脂肪：「我覺得大多一個Cup就完美，所以特登食肥，再做手術。」她憶述手術醒來後，立即將「Big波」成果與朋友開心Share：「同醫生傾傾吓就瞓着咗，因為做完手術會腫，所以係超大！好開心，仲即刻自拍Send畀朋友。」

問到日後做媽媽時，「人造奶」可會影響餵母乳？貪靚的她自言不適合餵母乳：「我有乳環，驚整親BB呀！」Naomi揚言不會「拆彈」，更希望繼續升Cup，以周秀娜為目標：「冇得拆彈，反而考慮再加，想同周秀娜齊名，好羨慕佢咁靚！」

公開打針 敢做敢認

除了隆胸外，曾在內地節目擔任主持的Naomi更曾在鏡頭前打針變靚：「我唔驚呀，唔係『偽人』，唔似啲人唔認。我喺鏡頭前咩都試過，打眼、打鼻、打下巴、打瘦面！」她表示現時亦嫌棄雙眼不夠靚，曾與醫生商量「開眼」：「除咗『大眼仔』就變矇豬眼，問過幾個醫生都唔建議做，佢哋話我夠靚唔使整！」

寸爆反擊：冇內涵

模界一向是非多，提到對手Cammi時，Naomi即發火：「我唔係佢對手，我哋唔同Level，冇同佢競爭過！（不屑？）唔係同一界別囉。」她澄清並沒有指斥對方醜樣：「只係覺得Nel Nel靚啲，因為佢有Fashion Sense。對於被Cammi踩長腿欠奉兼「55身」？她反擊：「係咩？佢都唔係『9頭身』，我覺得55身誇張咗少少，我腰短就真嘅，同佢比較嘅話！」

Naomi又暗寸Cammi冇學識：「靚唔止外表，仲要有內涵、修養同學識。有錢嘅話，我會去外國讀書增值，去韓國學韓文，而唔係去整容！咁細個開始整，幾時整到老？」她更自爆曾在公開活動認錯Cammi，直指對方整到「撞樣」：「我以為個女仔係Cammi，點知唔係佢嚟！（撞樣？）係呀，真o架！」

今年18歲的謝芷蕙（Cammi）去年為俘虜宅男，膽粗粗打透明質酸急救下巴影寫真，本以為可以瞞天過海，結果卻打出一個「膠下巴」趕客，她說：「以為冇人會發現，點知個個都話我個下巴整過，自己都唔係幾滿意。」事隔一年，她再接再厲，今次更將難度升級，到韓國動刀縫雙眼皮：「本身唔係好滿意未化妝前對眼，對眼比較腫同埋我係三眼皮，決定去韓國縫七針雙眼皮。」自小已想有一對銷魂眼的Cammi坦言在接受整容手術前，遭媽媽大力反對：「我求咗媽咪好耐，佢唔想個女搞咁多嘢。」最後謝媽媽被Cammi說服，更陪愛女到韓國進行「變靚大計」。

最想縮鼻兼隆胸

原來，Cammi與幾位「同道中人」曾在WhatsApp發起「模國界整容」群組，交流整容及扮靚心得：「有朋友去過台灣、日本、韓國、內地等地整雙眼皮，我覺得韓國做嘅效果最自然！」問到是次手術成效如何？她說：「我覺得尚可以，都算對稱！」

試過「V煞」下巴及人工雙眼皮後，Cammi表示現階段對鼻子尚有不滿：「個鼻真係冇整，問過醫生可唔可以打針整細個鼻，但打嘢入鼻反而會變大。一定要喺鼻度做手術開窿，之後切啲肉出嚟先得。我唔會做，太驚啦！」但她揚言不排除會隆胸：「擺個袋入胸就唔會啦！驚老咗會下垂同埋爆，不過抽脂隆胸就OK，我會揀大髀或肚嘅脂肪，再打落個胸，覺得會自然啲，但短期內都唔會做，18歲仲有得發育。」她又預告拍新寫真前會積極減肥，更會首次以半裸上陣。

似Nel Nel至夠Fun

Cammi經常被指外貌像張學潤（Nel Nel），問到一直變靚，是否想撇清「Nel味」？她說：「唔覺得似佢囉，但我唔會介意，成日有人喺街同我合照後，見佢哋寫『今日同Nel Nel合照』，覺得Funny。」不少模勁敵都經常抨擊她的外貌，提到馮鎵瀠（Naomi）公開寸她醜過Nel Nel？她即寸爆說：「多謝你幫我宣傳，見到報道佢話我醜樣，佢（Naomi）自稱有長腿嘛？我唔覺得係長腿囉，我睇佢身形根本係『55身』，唔係73比例！」句句擊中女人要害。

後記：唔靚？Delete再影！

在訪問中，可深深感受到「雙Mi」的愛美程度。Cammi一有空檔，便會害羞地拿出手機，要求記者替她拍照。影得唔靚？Delete再影過，認真貪靚！受訪後，她到對面的髮型屋扮靚，晚上又到夜校上課，真的要大嘆一句：模唔易做！

另一方面，剛在台灣炒車的Naomi雖然腳傷未愈，但記者約她做專訪時，她即一口答應，相當抵讚！她非常貪靚，受訪前一天「拐吓拐吓」到髮型屋染髮，拍攝時又叫記者盡量不要影到腳傷，最後，當然少不了受訪後的自拍Chok照！