Kelly願拍劇做茄喱啡

「四大」唱片公司與無綫和解後，環球及華納歌手前晚拉大隊亮相無綫音樂騷，事隔四年再歸隊的陳慧琳怕捱夜，但亦有意拍劇做「茄喱啡」，李克勤則力撐無綫冇偏私。

上月與「四大」唱片公司和解的無綫，前晚在電視城為「四大」歌手搞音樂騷《音樂在綫Mega Live》，出席歌手包括環球代表陳慧琳（Kelly）、李克勤、吳雨霏和關楚耀，而華納歌手則有官恩娜（Ella）、周柏豪和連詩雅等。對於四年未有亮相無綫，Kelly坦言「歸隊」既陌生又熟悉：「四年前我都未做阿媽。」稍後會做節目《決戰一分鐘》嘉賓的她表示，私下練遊戲練到手瘀。問到跟TVB有否其他合作？Kelly說：「都會。（拍劇？）唔好啦！冇得瞓！（可以傾條件！）應承咗都未必做到。（如果曾志偉邀請拍劇？）都可以考慮，我想做路人甲，可以快啲收工。」

擔任先頭部隊於《博愛歡樂傳萬家》獻唱的克勤，前晚力撐無綫沒有偏心：「之前話我最快亮相，咁啱啫！今次唔同唱片公司得閒都可以上（節目），即係唔存在黑名單，大家邁向和諧。之前用『嗌交戀人』形容，今次變約會，睇吓幾時再親密啲。」問到可會亮相其他電視台？主持《決》的克勤即賣口乖：「合約一向冇禁上其他台，但我主持《決》就唔可以做其他台嘅遊戲節目，咁做好大方、好公平，呢個關係好適合我。」至於會否簽無綫歌手合約，他表示要看公司的方針。

Ella怕講錯嘢

至於有傳Ella因簽約華納，導致與無綫高層樂易玲不和，Ella表示深信對方絕非小器之人：「之前的確有啲擔心，驚講錯嘢。（請佢食飯？）如果樂小姐賞面梗係會，有機會都想再拍劇。」又笑言幸而找回TVB泊車證，因之前以為沒機會再用，差點裱起它。