李彩華地獄式特訓教練跟身

參與另一跳水節目《星跳水立方》的李彩華，昨日接受電話訪問時表示，對跳水節目搞出人命而震驚及不開心，對於外界指摘電視台要求訓練不足的藝人參賽很危險，她說：「成個訓練好安全，每次藝人跳水都有教練在場。（畀助手在場？）可以，佢哋負責遞毛巾、影相之類，唔明點解個助手會出事。（慶幸早出局？）我都好努力練習，呢件事係意外。」而她前晚出席洋酒活動時，重提「撻水」落敗後痛哭一事：「發燒食咗藥，上到跳台個腦一片空白，而且跳落嚟之後好痛，大髀後面黑晒，喊係因為痛同知自己失誤，之前嘅訓練好地獄式！」有指整容者不能參賽，她笑言證明自己冇整容：「真係好危險o架！跳落嚟嗰陣好痛，如果有整，胸都爆！（范冰冰拒絕參加？）唔知佢，佢咁靚女，大家都想睇佢嘅英姿！」此外，她將於下月到上海及杭州拍劇，問到會否擔心H7N9禽流感，她說：「簽咗約冇辦法，惟有做多啲清潔工作，我之前仲有食雞，煮熟啲啦！」