周志文周志康中西合璧拍住煮
客家人愛美食又講究烹調，身為客家人的孖仔周志文和周志康，全靠在婆婆的耳濡目染之下，自小就是廚藝高手，但兩人卻各有所好，大哥志文主攻西餐，細佬志康愛煮中菜，就算中西合璧也一樣合拍。
周志文和周志康自小就黐着婆婆入廚房，兩位孝順孫仔最愛幫婆婆「執頭執尾」，溫馨又體貼，大哥志文視婆婆為二人的啟蒙老師：「細個同婆婆一齊住，屋企唔畀我哋打機，冇機打就貪得意跟婆婆入廚房煮嘢食，同埋佢一向負責我哋嘅伙食，所以成日都會跟佢入廚房，喺佢隔籬幫手切吓嘢，覺得好溫情好Warm。」
講到二人的拿手菜，志文主攻西餐，貪過程直接簡單，再花少少心思為完成品裝飾，效果即時夠晒浪漫，他更對烹飪充滿心得：「我覺得煮嘢食可以調劑心情，所以通常想放鬆心情，我就會入廚房煮吓嘢食。」相反志康則愛講求耐性的中菜，而且最愛煲粥：「其實煲粥都好講耐性同經驗，聽落好似好簡單，但其實落水嘅分量都好緊要！」
乜都鬥一餐
兩兄弟講得頭頭是道，但始終行動最實際，孖仔即場露兩手，合作炮製撚手小菜「咕嚕蝦球」。兩人由頭到尾有商有量，大哥負責主角蝦球，細佬負責配料和醬汁，輕輕鬆鬆完成一道色香味俱全的「咕嚕蝦球」。
二人如此合拍，志康即自爆二人小時候最愛「鬥餐飽」，他更大爆哥哥的童年火羅爆事：「我哋細個咩都鬥，一係鬥快行路，一係就鬥食得多。阿文試過細個有次同我鬥食嗰時，可能細個唔知自己嘅食量，佢居然食到嘔，真係好誇張！」
溫馨小貼士
配料不怕多，因為配料顏色愈多愈美觀，又可以大玩Mix & Match，令人看出廚師細心挑選配料食材的心機。
周志文（左）急不及待吃罐頭菠蘿。
周志文（左）和周志康合作炮製的「咕嚕蝦球」。
材料：大蝦數隻、洋葱1個、三色椒各1隻、罐頭菠蘿1罐、士多啤梨8粒、雞蛋2隻、蒜頭1個、生粉、黑椒粉、咕嚕醬汁
咕嚕蝦球步驟
先將三色椒切件，菠蘿切粒，蒜頭、洋葱切碎，大蝦剝殼挑腸，雞蛋打漿。
將蝦球加入胡椒粉及少許鹽拌勻，然後將蝦球浸在蛋漿大概1分鐘。
將蝦球撲上生粉，再放到滾油，炸至金黃色。
將蝦球撈起，放在隔油紙隔油後再放在碟上。
等待炸蝦球的同時，將三色椒煮好。
將切碎的洋葱及蒜頭放在平底鑊爆香。
再放其他配料拌勻和煮熱，約5分鐘再放咕嚕醬汁 （可用茄汁代替）炒勻。
將配料及醬汁全部淋在蝦球上，再用三色椒裝飾伴碟，大功告成！