城城冷笑敗走愁Lynn赴京打邊爐慶祝

「富黛戀」7年情玩完後，熊黛林（Lynn）連日來愁爆，相反郭富城則被《好報》拍到風騷出巡兼陰陰嘴笑！昨日二人分別離港，城城繼續風騷兼滔滔不絕，更開名力撐苟芸慧，又打算在北京之行開心打邊爐，相反Lynn則「敗走」首爾療情傷，素顏現身的她面容憔悴，未有回應記者提問，孤身上路的她顯得非常落寞！

日前晚上熊黛林在微博發表「重新上路」的分手宣言，與郭富城結束7年情，三小時後郭富城即被《好報》獨家拍到單拖現身灣仔，更未受分手影響心情，非常風騷！雖然城城初聞Lynn即黑面，但坐上戰車準備走人時，竟忍不住陰陰嘴笑，似是「甩難」！而前日Lynn在活動中愁爆喊住指「我係單身」，擺出一副委屈樣，不過城城態度依舊，還在微博講佛偈暗叫她放下。

昨午約4時24分，戴上帽和黑超的城城現身機場出發到北京工作，同行還有經理人小美及助手，滿面鬚根的城城拿着咖啡，還主動上前接受現場記者訪問，見他心情大靚，表現風騷，還開名力撐緋聞女友苟芸慧（苟姑娘），但提到Lynn即冷笑。

憔悴飛首爾療情傷

城︰郭富城 記︰記者

城︰（笑）又想問嘢呀？

記︰尋晚Lynn喺活動喊住認分手？

城︰其實我都講咗喇！喺微博講咗喇！自己一直低調，不過我想講今次呢件事唔涉及任何人，冇第三者，唔係大家外間咁講。我講埋今次就唔講，對任何人係要公平嘅。今次係兩個人之間嘅事，唔涉及第三者，苟姑娘同埋任何人都係無辜。

記︰同Lynn仲係好朋友？

城︰當然係朋友。

記︰會唔會安慰Lynn？

城︰（冷笑）哈！見大家呢排揣測咁多嘢，又嚟到機場，所以今日都表達晒我想講嘅嘢，想知更多心底話睇微博！

其後城城滔滔不絕，透露早前開演唱會時瘦了10磅，又指正計劃在北京、上海和廣州等地舉行巡迴個唱。問到此行會否戴口罩做足抗H7N9措施？他說︰「唔需要，我唔係去人煙稠密嘅地方，落機後會返酒店跑步。」他又指不會吃家禽，直言打邊爐可殺死細菌，非常安全，飛抵北京後晚上便食火鍋。由於城城講得非常興起，故原本乘搭5時機的他，被安排由職員通道進入禁區趕飛機。

城城風騷離港，反觀比他早一步離港的Lynn心情依然哀傷，據知，她今次是飛到韓國首爾療情傷！昨午約12時50分，戴黑超穿T恤牛仔褲的Lynn素顏現身機場，一臉憔悴，形單隻景孤身上路，急急腳衝入禁區。現場所見，她左手指仍戴着「重新上路」戒指，因行得快動作大，不慎露出腰間的肉。當記者拍照時，她刻意擰歪面，不願上鏡，又未有理會記者提問，及後說句「Bye Bye」便步入禁區。

苟姑娘抑鬱閉關

另外，被指是「小三」的苟姑娘有傳因抑鬱而狂食，令身形脹爆，據知她得知Lynn寸爆她「都唔知邊個應該喊」的言論後，情緒跌至谷底，選擇「閉關」謝絕朋友安慰，昨日記者致給她同樣沒有聽電話，連短訊都未有回覆。