陳國峰謝東閔鬥長「戲」

巨聲2幫的謝東閔與陳國峰在《女警愛作戰》中憑着出色表現而嶄露頭角，兩人有外表、有歌喉兼夠勤力，實力備受認同。老友鬼鬼的兩人希望一同發功，攜手在影壇闖一片天地，長做長有。

無綫小生花旦近年不斷進攻內地，或約滿離巢，令無綫出現人才荒。幸好，三季《超級巨聲》先後發掘了不少具潛質的新面孔，令電視界帶來一番新景象！其中，謝東閔（Brian）與陳國峰（Penny）參選第二季《超級巨聲》後便加入無綫，除了拍攝旅遊節目及主持音樂節目外，還獲安排拍劇，不少劇集都有他們的蹤影。記者笑言劇接劇撈得掂，他倆異口同聲說：「好彩啫！」

畢竟是歌唱比賽出身，但Brian與Penny現時主力拍劇及做主持，似乎離唱歌愈來愈遠，昔日戰友林欣彤與胡鴻鈞等都已出唱片，問到會否眼紅其他巨聲？Brian大方地說：「戥佢哋開心！佢哋條路起步得可能好啲，我哋條路可能行得漫長啲。依家緣分去咗拍劇，但我唔會放棄唱歌，都有Keep住練歌。」Penny亦說：「佢哋出碟我反而覺得欣慰，因為大家都係『巨聲』出身！拍劇我覺得挑戰性好大，揣摩同自己完全唔同嘅人物好好玩！」

相信努力有成果

娛樂圈人稱大染缸，有些人多年來浮浮沉沉，一直都沒有機會發揮所長，他倆亦坦言有此憂慮，但相信努力是會有成果的，Brian說：「呢兩年導演、觀眾同同事對我都好包容，有好多正面嘅評價，但我覺得已經係有經驗嘅演員，希望繼續努力，愈做愈好！」Penny則說：「做成點人哋有眼睇，人人際遇唔同！活到老做到老，唔好放棄就得！」