諸葛幸福少奶揸「煮」意

諸葛紫岐去年下嫁中星集團主席薛嘉麟後即疊埋心水享受「少奶奶」生活，踏入結婚一周年的她日前接受ontv獨家專訪，剖白婚後甜蜜生活，又分享與老爺奶奶的相處之道，深得薛家上下歡心的她可謂如魚得水！

去年榮升豪門靚太的名模諸葛紫岐（Marie），日前接受ontv獨家專訪，這位「少奶奶」坦言為了老公的健康，苦練廚藝後終成為「煮」婦：「我以前唔係好識煮飯，但係老公工作咁辛苦，食得好係好重要，所以我就學烹飪。依家我只要睇廿分鐘烹飪書，就知道點樣煮，連老公都讚我煮得好味過家傭！我好注重食材，同埋要少油少鹽，最重要係老公食得健康。」

婚後得到萬千寵愛的Marie笑言老公的冧招好煩：「佢好留意我，我嘅指甲油顏色變咗，眼睫毛短咗，佢都睇得出。不過佢份人唔識搞驚喜浪漫，只係會不停讚我靚！」

讚老爺奶奶開通

談到與老爺奶奶的相處之道，她說：「老爺奶奶思想好開明，我唔使做咩去氹佢哋開心，佢哋仲話見到我就已經好開心；之前老爺奶奶結婚四十周年，仲叫埋我同老公一齊影婚紗相！（老爺奶奶催你生BB？）佢哋從來冇畀壓力我！」想知道Marie更多甜到漏的真情剖白？仲唔快啲Click入ontv睇片！