Mr.衝破危機重新開始

樂隊Mr.人前人後雖「Friend過打Band」，但他們自爆在製作最新專輯時，關係曾出現重大危機，幸最終順利渡過難關。此外，成員Tom最想Dash結婚，並笑指若對方將來生小孩，定必像「陪月」一樣以湊B為樂，不去夾Band！

樂隊Mr.自2008年入行，主音Alan、結他手Ronny和MJ、低音結他手Dash及鼓手Tom同甘共苦5年，事業發展愈來愈順！不過，他們攀得愈高，便愈不想令樂迷失望，希望可以於音樂上有新突破。本來他們在製作新碟時，一心想注入跳舞元素，後來卻弄巧反拙，弄到遲遲未能出碟，還令他們夾Band之路出現重大危機！Tom說：「本來想製作一隻有跳舞元素嘅碟，過程中覺得編曲唔太滿意，而且就算幾有突破都好，我哋五個都做得唔開心同有壓力。然後我哋決定做番Mr.，唔理係乜嘢Topic，一齊去Band房Jam歌。」難怪Alan笑言這次專輯叫《New Beginning》，也就是因為學懂放開後的新開始。

在Mr.中，只有Tom已成家立室，他笑言囝囝杜杜與各團員已打成一片，但問到Tom會否想杜杜將來讀名校？他即笑說：「唔會，冇錢呀！我問過啲家長，最貴唔係學費，而係課外活動，佢哋真係會帶啲小朋友去瑞士測試水質！」問到最想哪一位成員結婚？他說：「我最想Dash結婚先，因為佢係一個家庭觀念好重嘅人，佢又恨有個家庭，當我哋屋企邊個有問題，佢都會好關心，十足陪月員一樣，所以如果佢將來有BB，可能會日日留喺屋企湊B，Band都唔夾！」

此時，Dash聽見Tom的這一席話後，即不忘Sell Mr.五子皆是「好仔」，並催促各成員趁早結婚：「我諗大家都想有自己家庭，我覺得五個人都有個共通點就係唔玩、唔蒲，相信都會係一個幾好嘅男人！我哋有一個已經結咗婚，所以希望大家都快啲啦！」