佘詩曼爆粗睇場合

藝人佘詩曼昨日出席護膚品《LANECOME Absolue尊貴茶聚》活動,她表示現多在內地工作,活動完結後也要趕往杭州開工。對於內地的H7N9禽流感疫情愈趨嚴重,她指會多吃維他命增強抵抗力。對於曾志偉日前在迪士尼辦生日會,於場內大唱粗口歌,事後志偉戲言要請她一同上台唱,她笑說:「嗰晚太開心好嘈,聽唔到唱乜嘢同講乜嘢。(即係話你成日講粗口?)講笑啫!嗰晚全部都係自己人,一家人閂埋房門咩笑都講得,唔會嬲!(你唔講粗口?)我唔信冇人會唔講粗口,不過要睇場合同發生咩事。我尋晚先同佢食飯,仲話佢擺我上枱!」

另外,有傳郭富城和熊黛林七年情告終,是苟芸慧介入所致,曾被封「姣佘」的她忠告苟姑娘:「做好自己就得,有實力唔怕畀人說三道四,我唔贊成做第三者,自己亦冇做過小三。」

佘詩曼出席活動後要趕回內地工作。