城城呵番爆喊苟姑娘

郭富城與熊黛林（Lynn）七年情告終，有傳苟芸慧是「小三」。昨晚城城出席慶功宴時無損心情，提起舊愛Lynn，即木無表情不願多談。反而談起新歡，即顯得憐香惜玉，還隔空安慰對方不要因事件落淚！

前晚Lynn在微博上載尾指戴戒指的照片，留言「重新上路」，暗示與城城已告一段落，據知「富黛」分手，除因Lynn希望獲得名分，催婚不果外，城城與苟芸慧的緋聞亦令她心淡，不再啞忍，繼而吵大鑊，導致一發不可收拾！昨晚城城出席《同謀》慶功宴，約七時十分，他離開寓所，乘七人車抵達尖沙咀，期間兩度衝紅燈，在車上木無表情，落車時刻意戴黑超，而現場已有五、六名保安守候護送他到會場。

心痛「新歡」聲譽受損

與張家輝齊到場的城城，心情靚爆又風騷，講電影時滔滔不絕，當問到與Lynn分手，即收起笑容，嚴肅地說：「你哋問呢啲嘢，我唔會答，大家知我性格，一直唔答，感情隨緣，我要答已答晒。」記者指他心情靚，未受分手影響，他說：「有工作，我不嬲對工作好熱誠。」而家輝受訪時不時為城城解圍，城城稱家輝的緋聞搞不起，還指着家輝開玩笑說：「畀個機會你同我搞緋聞。」家輝即笑說：「春光乍洩！」城城被追問分手時，即顯得有點不耐煩：「感情事一直低調，想保持私人空間，我一直畀心機拍戲，你哋一嚟就講緋聞，唔該尊重吓演員。」

城城被問起舊愛Lynn即強調不欲多談，但得知新歡苟姑娘昨日在活動上哭，即隔空安慰：「吓！咁慘，其實唔使喊，清者自清，佢性格係咁。」可能知講錯嘢，城城即時兜番：「不過其實我哋又唔係好熟。」在旁的家輝問如何補償，還叫他請苟姑娘食飯，城城甜笑說：「呢個時間請食飯，唔好喇啩！」之後又補充叫記者向苟姑娘講不好意思：「不實嘅報道，傷害咗女仔嘅聲譽。」

另一邊廂，苟芸慧昨日返電視城宣傳《金枝慾孽貳》，期間無綫一度阻止傳媒拍照，還關上化妝間門。其後到西環宣傳，被指是「小三」的她表示有睇報道，繼而眼紅紅嗚咽說：「好唔開心，冇做過畀人咁樣講，好難受，我唔係小三囉！（同城城聯絡﹖）每日都好畀心機做嘢，同佢冇聯絡，從來都冇聯絡過。」與城城有否發展機會？她稱暫時沒有機會，以工作為先。至於是否怕被講閒話？她說：「希望專心工作，而唔係我嘅緋聞。（Lynn話唔想再忍？）我明白作為女人嘅感覺，但我都好無奈畀人咁寫。（戥佢哋分手可惜？）」我嚟咗香港三、四年，唔知發生咩事，呢啲係佢哋兩個人嘅事，我唔可以幫佢哋回應。」講到網民鬧爆是「小三」，被問有否因此而喊，她眼濕濕：「其實都差唔多……」似乎要爆喊的她轉身離開終止訪問，並被安排由秘道離開。

而Lynn自爆分手後一直留在家中，足不出戶避傳媒，相信是留待今日出席活動才解答分手一事。