「恩公」謝安琪：佢好有禮貌

謝安琪（Kay）、林欣彤、鍾嘉欣及許廷鏗等昨晚錄影大革新的《勁歌金曲》，眾星皆為車禍身亡的陳僖儀（Sita）大感惋惜，故節目瀰漫憂傷的氣氛。

神情木然的林欣彤原來與Sita共用一個化妝師，她說：「我哋成日喺後台講笑傾偈，佢把聲好獨特，之前同佢喺《勁歌》合唱過，睇番網友Post我哋合照好難過，唔識畀反應！」而Kay曾任Sita入行前的歌唱比賽評判，Sita勝出後獲唱片公司賞識，故視Kay為恩人，Kay哽咽說：「我好鍾意Sita，佢好有禮貌、好親切，入行後仲特登多謝我！今朝睇到新聞後好唔安樂，成日行來行去做唔到嘢。」

對於Sita出事前在微博放上練歌相，令許廷鏗懷疑她是否太累致生意外：「同佢分享過對音樂嘅睇法，佢好有抱負，最可惜係未聽到佢首新歌就離開。」鍾嘉欣則指Sita潛力無限，並向她的家人送上祝福。