陳慧嫻回巢做硬一姐

陳慧嫻昨日舉行記者會宣布重返娘家「寶麗金」,入行30年的她預告會推出新碟以及於明年開個唱,並獲譚詠麟到場祝賀。不過,以全新造型示人的她慘被嘲笑十足女版「八両金」!

入行30年的陳慧嫻昨日舉行記者會宣布重返香港樂壇,環球唱片公司更為她重開「寶麗金」,令她穩坐一姐之位!「冬菇頭」現身的慧嫻大騷長腿,造型高貴,但專誠到場祝賀的譚詠麟卻不識貨並取笑她:「你個頭成個八両金咁!」慧嫻只好以笑遮醜。

明年紅館開騷

受訪時,問到會否嬲阿倫口不擇言?慧嫻搞笑地反寸他:「佢唔知呢啲係High Fashion啫,今年興呀!我好鍾意呢個頭,小學二年級都剪過。」她強調從未退出樂壇:「呢幾年主要喺內地開巡迴演唱會同商演,好多歌迷話想我唱番廣東歌,咁啱今年係我入行30年,又冇出唱片10年,所以想今年出廣東碟。」但透露因檔期問題,今年內未能在紅館開演唱會,希望明年能成事。

此外,提到曾志偉日前在迪士尼舉行60歲生日Party,既食煙又講粗口,阿倫說:「唔知佢哋咁高興喎!我十一點半先到,玩咗40分鐘就走咗喇,我又唔食煙嘅!嗰晚全部成年人,佢哋承擔得起!」

音樂組

陳慧嫻以新髮型示人,並大騷白滑美腿。

宣布重返香港樂壇的陳慧嫻,獲眾人敬酒祝賀。

阿倫獲慧嫻送抱兼送吻,但竟嘲笑對方,認真貪玩!