城城鬥戲被嘲搶飯食

郭富城前日扲荷包請演唱會台前幕後慶功，並預告積極「Hold肌」，準備無限Loop個唱！他還明言將以拍戲為主、唱歌為副，即使被嘲「搶飯食」亦冇有怕！！

郭富城為答謝《郭富城舞臨盛宴世界巡迴演唱會2013香港站安哥篇》的台前幕後工作人員，前日在灣仔大搞慶功宴，扲荷包埋單的他笑說：「今次係公司安排，但我喺後面全力支持，我打開銀包就好似銀行一樣！」他暗示個唱會開Part 3：「個舞台仲可以繼續改，總之永不休止！我都會Keep住最佳狀態，體能會保持得好好。（陳奕迅讚你嘅身形？）Keep係要靠意志！」問到完騷會否放肆一番，他說：「開演唱會根本係享受，唔使休息！（唔捨得紅館舞台？）唔係唔捨得，係唔習慣，我好想走去紅館，已經離唔開我生命嘅一部分，好似音樂劇一樣，永遠做唔完！」

唱歌當「副業」

城城日前揚言奪影帝後才會結婚，他果然打算全力進軍影壇：「我會全力做好演員角色，有人講笑話我『搶飯食』，但我知係講笑嘅，總之嚟緊我會電影為主，音樂為副。」城城主演的《寒戰》在金像獎上稱霸，但兩位導演因他無緣角逐影帝而公開致歉，城城對此說：「我覺得好感動，佢哋唔使介懷，獎項唔係人可以控制到，丟低晒唱歌都未必有獎。」

至於「城嫂」熊黛林早前為服裝品牌LOEWE的春夏Made To Order頂級訂製系列任模特兒，並將頭髮Set成長曲髮，散發濃濃女人味。