港姐又搞普選誓雪恥

去年港姐一人一票選冠軍，最後卻Down Server收場，成為年度笑話！2013年度港姐今日開始接受海外招募，無綫非戲劇製作總監余詠珊表示，今年會回復有準決賽的傳統，並繼續以投票機制普選港姐！

應屆港姐冠亞季軍張名雅、黃心穎、朱千雪（Tracy）、旅遊大使湯洛雯、最上鏡小姐岑杏賢及無綫非戲劇製作總監余詠珊等，昨日於尖沙咀出席《2013香港小姐競選》海外招募記者會。無綫去年大膽創新，首以一人一票選冠軍，但臨門一腳卻Down Server，成為年度一大笑話，被網民鬧爆兼要求補選。

恢復準決賽

無綫非戲劇製作總監余詠珊表示，今年決定「忘記背後，努力面對」，繼續投票機制，務求一雪前恥：「一路都諗有咩新方法，首先今年會加番準決賽。（都係一人一票？）傾緊，機制會有啲改變，不過都係同投票有關。」她指可能會加設投票方法，並避免到打仗及有流感的地方拍攝外景。

而全場打扮最性感的黃心穎，谷盡兩吋事業線，非常養眼！她笑說：「因為肥咗，依家要好好珍惜，減咗就冇！」而去年大熱倒灶的Tracy表示會支持兩個妹妹參選，問到會否怕再Down Server？她說：「之前視帝、視后試咗都Work，對公司有信心！（叫妹妹同你爭番個冠軍？）對佢哋有信心，佢哋高過我、瘦過我，不過要讀完書先。」另外，張名雅、黃心穎及湯洛雯等都表示會呼籲朋友參選。