梁家輝Chok鬥林峯三哥

梁家輝乃第十期無綫訓練班出身，早前基於人情答應老友曾志偉拍劇，其實他對無綫都有份情意結。據知他參演的無綫劇於九月開拍，同劇還有「Chok王」苗僑偉（三哥）及林峯，但無綫方面仍未跟這位出爐影帝傾價，卻表示會給合理價。

無綫的劇集不論主角或配角於三線劇中重複又重複，故不得不加把勁找「外援」助陣！似足「無綫高層」的志偉都大耍人情牌，傾掂老友兼出爐影帝梁家輝回無綫拍劇，參演莊偉健監製的三十集時裝劇，會到越南取景，與兩大「Chok王」苗僑偉（三哥）及林峯合作，女主角方面則仍未有定案。

流TVB血

據知無綫方面未正式跟家輝傾談價錢，但家輝乃無綫第十期訓練班出身，笑言流着TVB的血，故都希望返無綫拍劇留個紀念，無綫方面表示必會給家輝一個合理的價錢。

三哥昨日接受記者電話訪問時表示，前晚於志偉生日會中跟家輝傾談過，但對方的檔期有些問題，故可能要延期，三哥坦言期待跟對方合作：「佢係我師弟，希望等到！」而身在橫店的林峯獲悉可跟影帝合作時，開心地說：「真係o架？好開心！佢係我兒時偶像，依家仲可以喺電視劇合作，簡直唔使考慮，希望可以喺對方身上學到更多演技方面嘅嘢！」

女主角未定

無綫戲劇製作總監梁家樹表示家輝檔期都很密，一切還在傾談中，家輝亦未有時間看劇本，問到今次是否重金禮聘時，他說：「都未傾到價錢，但係佢今次返無綫拍劇係有情意結嘅，會畀番個合理價錢佢。」至於身在佛山的監製莊偉健透露，自劇集《大唐雙龍傳》後未曾跟林峯合作過，亦未曾與三哥合作過，問到女主角人選，他說：「等我哋度埋個古仔先啦！」